Вялікай Перамозе Нацыянальная бібліятэка Беларусі прысвячае тэматычную кніжную выстаўку “Помні, свет уратаваны!”, якая праводзіцца з 25 красавіка па 20 чэрвеня на 2-м паверсе кальцавога калідора.
У экспазіцыі прадстаўлена звыш 150 кніг, выдадзеных за апошнія тры гады, якія расказваюць пра гераізм, мужнасць і стойкасць савецкіх людзей у гады Вялікай Айчыннай вайны. Гэта і апавяданні пра ўнікальныя чалавечыя лёсы, невядомыя або малавядомыя ваенныя падзеі, інтэрнацыянальны характар подзвігаў, якія здзяйсняліся ў імя Перамогі. Галоўны сэнс твораў – святая памяць пра тых, хто заваяваў права на неўміручасць самай дарагой цаной – цаной жыцця.
Праходзяць дзесяцігоддзі, змяняюцца пакаленні, але Перамога савецкага народа ў Вялікай Айчыннай вайне 1941–1945 гг. навечна застанецца ў гераічным летапісе нашай краіны як знак нацыянальнага гонару, воінскай славы і доблесці. Менавіта жыхары Беларусі першымі прынялі на сябе вераломны ўдар 22 чэрвеня 1941 г. Тысячы нашых суайчыннікаў у бязлітаснай барацьбе з ворагам паказалі прыклады мужнасці, стойкасці і гераізму, выконвалі адказныя задачы па абароне Айчыны. Перамога вяршылася не толькі ў вялікіх бітвах, але і ў баях за кожную вышыню, кожны населены пункт, кожны горад, кожную вёску.
На месцах кровапралітных баёў у гарадах і населеных пунктах сёння стаяць мемарыялы, помнікі і абеліскі, да іх зноў і зноў прыходзяць людзі ўсіх пакаленняў, каб пакланіцца несмяротнаму подзвігу землякоў. Памяць пра герояў ушанавана ў назвах вуліц, плошчаў, сквераў.
Наш святы абавязак – захоўваць гэтую гераічную спадчыну, баявыя традыцыі беларускага народа, перадаваць новаму пакаленню самае святое пачуццё – любові да Радзімы, суверэннай і незалежнай Беларусі.
Кантактны тэлефон: (8 017) 293 28 86.