З 8 студзеня па 6 лютага ў аддзеле абслугоўвання афіцыйнымі дакументамі (пам. 207) адкрыта выстаўка “Развіццё фермерскіх гаспадарак: міжнародны і нацыянальны вопыт”, прысвечаная Міжнароднаму году сямейных фермерскіх гаспадарак.
2014-ты быў афіцыйна абвешчаны Міжнародным годам сямейных фермерскіх гаспадарак на 66-й сесіі Генеральнай Асамблеі ААН 22 снежня 2011 года (A/RES/66/222).
Абраўшы тэму Года, Арганізацыя Аб’яднаных Нацый адзначыла, што яго правядзенне павінна быць накіравана на павышэнне дасведчанасці пра сямейныя і малыя фермерскія гаспадаркі, іх ролю ва ўмацаванні харчовай бяспекі і паляпшэнні харчавання, сістэм жыццезабеспячэння, пра кіраванне прыроднымі рэсурсамі, ахову навакольнага асяроддзя і дасягненне ўстойлівага развіцця, асабліва ў сельскіх рэгіёнах.
Генеральная Асамблея падкрэсліла, што неабходна змясціць сямейныя фермерскія гаспадаркі ў цэнтр нацыянальных і рэгіянальных праграм развіцця і рэкамендавала ўрадам аказваць ім усебаковую падтрымку, каб яны змаглі рэалізаваць свой патэнцыял. Падтрымка павінна ўключаць аказанне тэхнічнай дапамогі і распрацоўку стратэгій, накіраваных на рост прадукцыйнасці сямейных фермаў, забеспячэнне доступу да неабходных тэхналогій, зямельных і водных рэсурсаў, крэдытаў і рынкаў, а таксама паляпшэнне інвестыцыйнага клімату.
Міжнародны год сямейных фермерскіх гаспадарак будзе таксама спрыяць шырокай дыскусіі і супрацоўніцтву на нацыянальным, рэгіянальным і глабальным узроўнях у мэтах пашырэння разумення і ўсведамлення цяжкасцей, з якімі сутыкаюцца дробныя фермеры, а таксама вызначэння эфектыўных спосабаў аказання садзейнічання сямейным фермерскім гаспадаркам.
У развітых і краінах, якія развіваюцца, колькасць сямейных фермаў дасягае звыш 500 мільёнаў – гэта асноўная форма вядзення сельскай гаспадаркі ў сектары вытворчасці харчовых прадуктаў. Сямейная фермерская гаспадарка – гэта спосаб арганізацыі сельскагаспадарчай, лясной, рыбнай, пашавай вытворчасці, якая ажыццяўляецца і кіруецца сям’ёй і абапіраецца пераважна на працу членаў сям’і. Яны вырабляюць харч для мільярдаў людзей. У многіх краінах, якія развіваюцца, на сямейныя фермерскія гаспадаркі прыходзіцца да 80 працэнтаў вытворчасці сярод усіх формаў фермерскіх гаспадарак.
Фарміраванне фермерскіх гаспадарак у Беларусі пачалося ў пачатку 90-х гадоў ХХ стагоддзя з прыняцця ў 1991 годзе Закона аб сялянскай (фермерскай) гаспадарцы, які рэгламентаваў працу сялянскіх гаспадарак. На сучасны момант, па дадзеных Беларускага грамадскага аб’яднання фермераў, у Рэспубліцы Беларусь функцыянуе 1 955 фермерскіх гаспадарак. У сярэднім на адну гаспадарку прыходзіцца 54 гектары сельскагаспадарчых угоддзяў, у тым ліку 40 гектараў раллі. Усяго за фермерскімі гаспадаркамі замацавана 124,2 тысячы гектараў сельскагаспадарчых угоддзяў. Удзельная вага фермерскіх гаспадарак у агульным аб’ёме вытворчасці валавой прадукцыі сельскай гаспадаркі ў апошнія гады вагаецца ад 1,5 да 1,8 %. У асноўным фермеры спецыялізуюцца на вытворчасці раслінаводчай прадукцыі; пры гэтым 40 % фермераў вырабляюць пераважна збожжа, 30 % – бульбу і гародніну. Толькі 20 % фермераў займаюцца вытворчасцю жывёлагадоўчай прадукцыі – малака, мяса, рыбы, мёду, футра.
Дзяржаўная праграма адраджэння сяла на 2011–2015 гг. прадугледжвае меры, накіраваныя на далейшае развіццё фермерскіх гаспадарак. Ім дадзены спецыяльны рэжым падаткаабкладання. Шэраг фермерскіх гаспадарак задзейнічаны ў дзяржаўных галіновых праграмах. Ва ўсіх абласцях створаны грамадскія аб’яднанні і асацыяцыі фермерскіх гаспадарак.
На выстаўцы прадстаўлена звыш 60 дакументаў на рускай і англійскай мовах: кнігі, перыядычныя выданні, брашуры, буклеты.
Экспазіцыя ўключае наступныя тэматычныя раздзелы:
- Арганізацыя і эканамічныя асновы фермерскіх гаспадарак.
- Развіццё фермерскіх гаспадарак: замежны і айчынны вопыт.
- Роля фермерскіх і асабістых падсобных гаспадарак у развіцці сельскай гаспадаркі.
- Фермерская жывёлагадоўля.
- Фермерскія гаспадаркі Беларусі: стан і тэндэнцыі развіцця.
Выстаўка будзе цікавай фермерам, спецыялістам у галіне сельскай гаспадаркі, эканомікі прыродакарыстання, аховы навакольнага асяроддзя, вучоным, студэнтам, аспірантам і ўсім, хто цікавіцца праблемамі развіцця фермерскіх гаспадарак.
Карысныя спасылкі
- Міжнародны год сямейных фермерскіх гаспадарак
- Міжнародны кааператыўны альянс (МКА)
- Сусветны сельскі форум (ВСФ)
- Сусветная фермерская арганізацыя (ВФО)
- Арганізацыя "Вія Кампезіна"
- Кампанія па прасоўванні Міжнароднага года сямейных фермерскіх гаспадарак