З 2 па 31 снежня ў зале беларускай літаратуры (пам. 205) праходзіць выстаўка “Шчырае поле паэта”, прысвечаная 70-годдзю беларускага пісьменніка, лаўрэата Літаратурнай прэміі Беларусі імя А. Куляшова (1989) Казіміра Вікенцьевіча Камейшы.
У сваіх творах пісьменнік імкнецца закрануць самыя вострыя праблемы сучаснасці, засяроджвае ўвагу чытача на спрадвечных каштоўнасцях чалавека: любві, дабрыні, высакароднасці. Ён піша пра родны край і ўзаемаадносіны чалавека і прыроды, пра каханне і жаночы лёс, звяртаецца да тэмы вайны і чарнобыльскай аварыі, узнімае праблему роднай мовы.
Беларускі паэт А. Сербантовіч ужо на пачатку творчага шляху К. Камейшы адзначаў: “… маладога паэта чакае бясспрэчны поспех…”.
На выстаўцы можна пазнаёміцца з кнігамі аўтара “Восеньскія позвы” (1969), “Мембрана” (1972), “Нектар” (1974), “Тут мае вёсны прычалены” (1977), “Пярэймы дня” (1989) і інш. Пісьменнік і сёння актыўна працуе, піша вершы, крытычныя артыкулы, спрабуе свае сілы ў прозе. На выставачнай паліцы прадстаўлена яго новая кніга лірычных запісаў і мініяцюр “Ад Кромані да Свіцязі” (2013).
Сярод экспанатаў – кніга “Я з пушчы” (1995), у якую ўвайшлі лепшыя вершы паэта. Яна стала вынікам больш чым 30-гадовай творчай працы К. Камейшы, яго паэтычнай аўтабіяграфіяй.
Плённа працуе К. Камейша і ў дзіцячай літаратуры. На яго рахунку такія цудоўныя кнігі вершаў для дзяцей, як “Гаёўка” (1975), “Буслянка” (1985), “Дзятлава кузня” (1987), “Гарцунок” (1991), “Крыгагром” (2001). Усе яны клічуць чытача ў непаўторны і чароўны свет прыроды Налібоцкага краю.Асобны раздзел экспазіцыі прысвечаны літаратуразнаўчай дзейнасці пісьменніка. Ён займаецца вывучэннем творчасці М. Багдановіча, Я. Коласа, М. Лужаніна, М. Маляўкі, выступае з рэцэнзіямі, крытычнымі артыкуламі, нарысамі.
Шмат увагі аддае К. Камейша мастацкаму перакладу. На выстаўцы можна пазнаёміцца з перакладамі пісьменніка з рускай, польскай, украінскай, грузінскай і іншых моў.
Завяршаюць экспазіцыю энцыклапедычныя матэрыялы, артыкулы пра жыццё і творчасць К. Камейшы.
Экспазіцыя налічвае каля 140 дакументаў.
Кантактны тэлефон: (8 017) 293 27 16.