З 11 кастрычніка 2011 г. да 11 студзеня 2012 г. у Нацыянальнай бібліятэцы Беларусі (3-ці паверх, кальцавы калідор) праходзіць выстаўка кніг аднаго твора "Stanisław Lem. Solaris".
2011 год – 90 гадоў з дня нараджэння сусветна вядомага фантаста Станіслава Лема і 50 гадоў несмяротнаму яго твору.
Раман "Салярыс" выйшаў у 1961 г. і стаў вяршыняй мастацкай творчасці пісьменніка. Гэта фантастычны раман з філасофскай праблематыкай, прысвечаны ўзаемаадносінам людзей будучыні з "разумным акіянам" планеты Салярыс. У кнізе аўтар разважае пра пытанні філасофіі, існаванне чалавека, этыку, быццё і Бога. У сваёй прадмове да рускага выдання рамана (1963 г.) Лем пісаў: "Салярыс павінен быў быць мадэллю сустрэчы чалавецтва на яго дарозе да зорак са з’явай невядомай і незразумелай.… Але я не пісаў тэарэтычна-абстрактнага трактата і таму павінен быў распавесці цалкам пэўную гісторыю, каб пасродкам яе, праз яе выказаць адну простую думку: "Сярод зорак нас чакае невядомасць".
На выстаўцы "Stanisław Lem. Solaris" прадстаўлена 56 выданняў гэтага твора з калекцыі лемолага Віктара Язневіча і 7 кніг з фондаў Нацыянальнай бібліятэкі Беларусі. Гэта выданні рамана "Салярыс" на 24 мовах: польскай, беларускай, рускай, украінскай, чэшскай, сербскай, балгарскай, венгерскай, румынскай, нямецкай, англійскай, літоўскай, латышскай, эстонскай, шведскай, італьянскай, іспанскай, партугальскай, грэчаскай, нарвежскай, дацкай, галандскай, грузінскай, японскай мовах.
Раман "Салярыс" быў экранізаваны тройчы: у 1968 г. рэжысёрам Барысам Нірэнбургам (тэлевізійны фільм, СССР); у 1972 г. – Андрэем Таркоўскім (СССР); у 2002 г. – Стывенам Садэрбергам (ЗША). Па гэтым жа рамане былі пастаўленыя тэатральныя спектаклі (1987, Вялікабрытанія; 2005, ФРГ, Дзюсельдорф; 2009, Польшча, Варшава), опера (1996, ФРГ, Мюнхен) і балет (1990, СССР, Днепрапятроўск). У экспазіцыі прадстаўленыя матэрыялы, прысвечаныя экранізацыі знакамітага рамана.