Да святкавання Дня Незалежнасці Рэспублікі Беларусь (3 ліпеня) у бібліятэцы арганізавана тэматычная кніжная выстаўка “Сучасная Беларусь”.
Экспазіцыя налічвае каля 200 самых новых выданняў, сярод якіх кнігі, што расказваюць пра станаўленне беларускай дзяржаўнасці, дасягненні ў сацыяльна-эканамічнай, навуковай і культурнай сферах, знешнепалітычныя і знешнеэканамічныя сувязі Беларусі. У выданнях знайшлі адлюстраванне лепшыя традыцыі беларускага народа, унікальныя прыродныя багацці краіны.
Раздзел “Краіна Беларусь” змяшчае кнігі па гісторыі роднага краю, грамадска-палітычную і сацыяльную літаратуру пра сучасны стан рэспублікі і шляхі яе далейшага развіцця.
Раздзел “Вобразы мілыя роднага краю” прысвечаны запаведным куткам “сінявокай”, прыгажосці і багаццю яе прыроды, ахове навакольнага асяроддзя. Тут можна знайсці звесткі пра нацыянальныя паркі, запаведнікі і заказнікі.
Частка экспазіцыі адлюстроўвае сучасную культуру і мастацтва Беларусі. Дэманструюцца кнігі пра культурна-гістарычную спадчыну, помнікі культавай архітэктуры, памятныя мясціны нашай краіны, энцыклапедычныя даведнікі, фотаальбомы, буклеты, якія пацвярджаюць прывабны імідж рэспублікі.
Чытачы і наведвальнікі маюць магчымасць азнаёміцца з самымі новымі кнігамі беларускіх выдавецтваў, якія пабачылі свет ў апошнія тры гады.
Экспазіцыя разлічана на шырокую аўдыторыю.
Выстаўка размешчана ў кальцавым калідоры 2-га паверха і будзе дэманстравацца да 14 верасня 2017 года.
Кантактны тэлефон: (8 017) 293 28 86.