З 8 верасня па 13 кастрычніка ў аддзеле абслугоўвання афіцыйнымі дакументамі (пам. 207) адкрыта тэматычная кніжная выстаўка “Свет без войнаў і насілля!”, прысвечаная Міжнароднаму дню міру.

Гэты Дзень быў заснаваны Генеральнай Асамблеяй ААН (рэзалюцыя A/RES/36/67) у 1981 годзе і штогод адзначаўся ў трэці аўторак верасня – дзень адкрыцця чарговых сесій Асамблеі. Праз дваццаць гадоў, у 2001 годзе, Генеральная Асамблея аднагалосна прыняла рэзалюцыю A/RES/55/282, у якой пастанавіла, што з 2002 года Міжнародны дзень міру будзе адзначацца штогод 21 верасня.

Асамблея заявіла, што Міжнародны дзень міру будзе адзначацца як дзень глабальнага спынення агню і адмаўлення ад насілля, і прапанавала ўсім дзяржавам і народам спыніць ваенныя дзеянні на працягу гэтага дня.

Для большасці людзей нашай планеты мір – гэта паўсядзённая рэальнасць і яго неацэнны дарунак можа асабліва не заўважацца. Але калі для кагосьці спакой на вуліцах звыклы і непрыкметны, то для іншых мірнае неба над галавой – мара. Мільёны людзей на Зямлі жывуць у атмасферы нестабільнасці і страху, пакутуюць ад войнаў, канфліктаў і тых бед, якія гэтыя войны прыносяць з сабой. Устанаўленнем гэтага свята ААН заклікае людзей задумацца аб нетрываласці такога натуральнага для многіх міру без войнаў і насілля. Яно заклікана прымусіць людзей не толькі задумацца пра мір, але і зрабіць што-небудзь дзеля яго.

ААН выкарыстоўвае святкаванне Міжнароднага дня міру для прыцягнення ўвагі да сваёй рознабаковай працы ў падтрымку міру і стымулявання дзяржаў, міжнародных супольніцтваў і арганізацый, абшчын і асобных людзей на ўсёй планеце да асэнсавання праблем міру, абмену інфармацыяй і вопыту дзейнасці па дасягненні і падтрыманні міру.

Само святкаванне Міжнароднага дня міру суправаджаецца рознымі мерапрыемствамі, аднак нязменнай з’яўляецца цырымонія каля Звона міру. Яна традыцыйна адкрываецца зваротам Генеральнага сакратара ААН, пасля якога ён ударае ў звон. Затым ідзе хвіліна маўчання. Звон міру быў паднесены Арганізацыі Аб’яднаных Нацый Японіяй у чэрвені 1954 года. Ён адліты з манет, сабраных дзецьмі з 60 краін. Надпіс на звоне абвяшчае: “Няхай жыве ўсеагульны мір ва ўсім свеце!”. І штогод 21 верасня людзі ва ўсім свеце збіраюцца для таго, каб зноў пацвердзіць гэтую думку, успомніць ахвяр канфліктаў і заявіць пра сваю гатоўнасць прысвяціць сябе пабудове больш бяспечнага і больш справядлівага міру.

Падзеі мінулага года – войны, тэрарызм, ваенныя расходы, глыбокія супярэчнасці, якія раздзяляюць народы і асобных людзей, абумовілі беспрэцэдэнтную актуальнасць Міжнароднага дня міру і ў бягучым годзе.

Прапанаваная чытачам выстаўка налічвае больш за 100 дакументаў, якія раскрываюць работу міжнародных арганізацый, урадавых і няўрадавых устаноў і груп у галіне падтрымання міру і бяспекі. Вялікую частку экспазіцыі складаюць дакументы міжнародных арганізацый (ААН, ЮНЕСКА, Еўрапейскага саюза, Савета Еўропы і інш.) на рускай і англійскай мовах: кнігі, перыядычныя выданні, мімеаграфаваныя матэрыялы ААН.

Выстаўка ўключае наступныя тэматычныя раздзелы:

Міжнародныя пагадненні і міжнародна-прававыя дакументы па падтрыманні міру і бяспекі;
Раззбраенне, ядзернае раззбраенне;
Аперацыі па падтрыманні міру;
Міратворчасць і мірабудаўніцтва;
Барацьба супраць тэрарызму і ядзернага тэрарызму;
Правы чалавека і падтрыманне міру;
Дэмакратызацыя і культура міру.

Выстаўка будзе цікавая спецыялістам у галіне сусветнай палітыкі, дыпламатыі, міжнародных адносін, міжнароднага права, канфлікталогіі, а таксама студэнтам, магістрантам, палітычным і грамадскім дзеячам і ўсім тым, каму дарагі мір на Зямлі.

Карысныя спасылкі

Дакументы

Рэзалюцыі Генеральнай Асамблеі аб Міжнародным дні міру:

A/RES/55/282 (7 верасня 2001 года)
A/RES/36/67 (30 лістапада 1981 года)

Дэкларацыя і Праграма дзеянняў у галіне культуры міру (1999 год)
Дэкларацыя аб праве народаў на мір (1984 год)
Дэкларацыя аб распаўсюджванні сярод моладзі ідэалаў міру, узаемнай павагі і ўзаемаразумення паміж народамі (1965 год)

Свет без войнаў і насілля!

Інфармацыйныя рэсурсы

Паслугі