З 21 лютага працуе тэматычная кніжная выстаўка “Святочны дзень сапраўдных мужчын: з калекцыі паштовак НББ”, прысвечаная Дню абаронцаў Айчыны і Узброеных сіл Рэспублікі Беларусь.
Гісторыя свята налічвае ўжо каля 100 гадоў і ідзе каранямі ў часы Першай сусветнай вайны. У лютым 1918 года атрады Чырвонай гвардыі атрымалі свае першыя перамогі пад Псковам і Нарвай над рэгулярнымі войскамі кайзераўскай Германіі. Вось гэтыя першыя перамогі і сталі днём нараджэння Чырвонай Арміі. У 1922 годзе гэтая дата была афіцыйна абвешчана Днём Чырвонай Арміі. Пазней 23 лютага штогод адзначалася ў СССР на дзяржаўным узроўні як усенароднае свята – Дзень Савецкай Арміі і Ваенна-Марскога Флота.
Пасля распаду СССР гэтай даце ў Рэспубліцы Беларусь далі назву Дзень Абаронцаў Айчыны і Узброеных Сіл Рэспублікі Беларусь.
На выстаўцы “Святочны дзень сапраўдных мужчын” прадстаўлена звыш 60 паштовак, якія былі надрукаваны ў Расіі і Беларусі ў перыяд з 1960 па 2016 год. Кожная з паштовак не толькі адлюстроўвае індывідуальнасць мастака, дызайнера ці фатографа, які стварыў яе, але і разам з тым з’яўляецца сведкай свайго часу і застаецца важнай крыніцай для ацэнкі ўспрымання гэтага свята на працягу многіх гадоў.
Шмат паштовак з гэтай калекцыі будуць паказаны на выстаўцы ўпершыню. Матэрыял размешчаны ў храналагічным парадку. Асаблівую цікавасць выклікаюць паштоўкі, выпушчаныя ў Беларусі ў 60-я гг. XX стагоддзя.
Экспазіцыя працуе па 30 сакавіка ў кальцавым калідоры 3-га паверха
Кантактны тэлефон: (8 017) 293 28 86.