З 17 па 31 снежня 2007 года ў зале беларускай літаратуры (пам. 205) адкрыта кніжная выстаўка "Цэлы свет – дзецям", прысвечаная 80-годдзю Маргарыты Барысаўны Яфімавай, беларускаму літаратуразнаўцу і крытыку, кандыдату філалагічных навук, выдатнаму педагогу і цудоўнаму чалавеку, прыгожай, інтэлігентнай і сціплай жанчыне.
Маргарыта Барысаўна вельмі любіць родную мову і айчынную літаратуру. У сваёй літаратуразнаўчай іпедагагічнай дзейнасці яна клапоціцца аб тым, каб данесці і прывіць гэтую любоў дзецям і моладзі. Даследчыца глыбока пераканана ў тым, што "роднае слова захапляе, узбагачае, выхоўвае". Таму ўсе яе літаратуразнаўчыя, навукова-даследчыя, метадычныя працы маюць выхаваўчы характар.
На выстаўцы прадстаўлена больш за 50 выданняў. У экспазіцыі – аўтарэферат абароненай кандыдацкай дысертацыі на тэму "Творчество Янки Мавра" (1955), кнігі "Янка Маўр. Жыццё і творчасць" (1960), "Цэлы свет – дзецям: творчы партрэт Янкі Маўра" (1983), "Зямля бацькоў, зямля святая” (1997), "Слова краска, слова ззянне…” (2000), “Уладзімір Ліпскі: “Не выжываю, а жыву!..”” (2005), аўтарам-укладальнікам якой з’яўляецца М. Яфімава.
У ліку прац аўтара – агляды творчасці Уладзіміра Ягоўдзіка, Паўла Місько, Міколы Маляўкі і іншых, а таксама артыкулы, у якіхдаследуецца творчасць Янкі Купалы, Якуба Коласа, Змітрака Бядулі, Максіма Багдановіча, Ніла Гілевіча, Алеся Якімовіча, Станіслава Шушкевіча і многіх іншых пісьменнікаў.
З публікацыяміМ.Б. Яфімавай як даследчыцы гісторыі беларускай літаратуры наведвальнікаў выстаўкі знаёміць шэраг кніг, у якіх ёсць раздзелы, напісаныя Маргарытай Барысаўнай. Гэта такія выданні, як "Гісторыя беларускай савецкай літаратуры (1917–1940)" (1981), “Гісторыя беларускай літаратуры: XX стагоддзе (20–50-я гг.)” (2000), "Беларуская літаратура: проза 20-х гг." (1996, 1997), "Народныя песняры" (1972), "З глыбінь народных" (1982), "Творчая і метадычная спадчына Якуба Коласа" (1992) і іншыя.
Маргарыта Барысаўна з’яўляецца аўтарам першых праграм па беларускай дзіцячай літаратуры, у сааўтарстве выдала першыя падручнікі па дзіцячай літаратуры.
Хрэстаматыя "Беларуская дзіцячая літаратура" (1996, 2003), складзеная разам з дачкою Вікторыяй Ляшук, сведчыць аб настаўніцкай дынастыі.Дзякуючы карпатлівай працы ў выданне ўключаны творы аўтараў, імёны якіх шмат гадоў незаслужана заставаліся ў забыцці.
М.Б. Яфімава – аўтар шматлікіх прадмоў, рэцэнзій, артыкулаў па дзіцячай літаратуры, методыцы выкладання літаратуры, мастацкага чытання ў школе.
Аб творчым лёсеМаргарыты Барысаўныраскажуць публікацыі, аўтарамі якіх з`яўляюцца В. Варапаева, Л. Несцяровіч, Р. Шкраба, С. Грыцкевіч, І. Штэйнер, В. Грышкевіч і іншыя.
Кантактны тэлефон 293-27-16
 |
 |
 |
 |
