З 6 верасня да 18 кастрычніка ў аддзеле абслугоўвання афіцыйнымі дакументамі (пам. 207) будзе працаваць тэматычная выстаўка “Турызм у XXI стагоддзі: устойлівасць і развіццё”, прысвечаная Сусветнаму дню турызму.
Гэты Дзень быў устаноўлены на 3-й сесіі Генеральнай асамблеі Сусветнай турысцкай арганізацыі (ЮНВТО) у верасні 1979 года і штогод адзначаецца 27 верасня, пачынаючы з 1980 года. Дата была абраная не выпадкова – 27 верасня 1970 года быў прыняты Статут ЮНВТО.
Мэта ўстанаўлення свята – засяроджванне ўвагі міжнароднай супольнасці на важнасці турызму, яго сацыяльным, культурным, палітычным і эканамічным значэнні, дэманстрацыя патэнцыялу турызму для дасягнення Мэт у галіне ўстойлівага развіцця (МУР) і пераадолення надзённых праблем сучаснасці..
Свята адзначаецца ў большасці краін свету і кожны год праходзіць пад новым дэвізам. Згодна з рашэннем, прынятым на 21-й сесіі ЮНВТО, афіцыйныя ўрачыстасці з нагоды Сусветнага дня турызму ў 2017 годзе пройдуць у Катары пад дэвізам “Устойлівы турызм – інструмент для развіцця”.
На сёння турызм – трэцяя найбуйнейшая экспартаарыентаваная індустрыя ў свеце пасля хімічнай і паліўнай прамысловасці. Ён ператварыўся ў магутны сектар эканомікі, стаўшы рухаючай сілай, якая паляпшае жыццё мільёнаў людзей. Турызм стварае працоўныя месцы і магчымасці, уплывае на рост ВУП, павелічэнне гандлю і экспарту.
Па дадзеных Сусветнай турыстычнай арганізацыі, на гэты сектар прыпадае каля 7 % сусветнага экспарту, адно з адзінаццаці працоўных месцаў і 10 % сусветнага ВУП. Турызм інтэграваны ў 400 галін і забяспечвае штогод больш 1,5 трлн долараў прыбытку, прыносячы надзею і росквіт мільёнам людзей ва ўсім свеце.
Турызм – пасол міру, надзейны сродак паляпшэння ўзаемаразумення паміж народамі, распаўсюджвання ведаў пра багатую спадчыну розных цывілізацый і забеспячэння беражлівага стаўлення да вечных каштоўнасцей розных культур.
Сёння больш за 1,2 млрд чалавек штогод выязджаюць за мяжу, а да 2030 года, па дадзеных ЮНВТО, гэты паказчык складзе 1,8 млрд.
Развіццё турызму з’яўляецца адным з прыярытэтных напрамкаў сацыяльна-эканамічнага развіцця Рэспублікі Беларусь. Дзяржаўная праграма “Беларусь гасцінная” на 2016–2020 гады накіравана на фарміраванне і развіццё сучаснага канкурэнтаздольнага турыстычнага комплексу, павелічэнне ўкладу турызму ў развіццё нацыянальнай эканомікі – турызм паступова становіцца адной з ключавых галін для стварэння новых працоўных месцаў, эканамічнага росту і прыцягнення інвестыцый.
Турыстычны патэнцыял Беларусі заключаецца ў разнастайнасці і прыгажосці прыроды, унікальнасці гісторыка-культурнай спадчыны. У рэспубліцы налічваецца больш за 15 тыс. аб’ектаў, якія маюць гістарычную, культурную, архітэктурную значнасць, а таксама памятных месцаў, звязаных з імёнамі выдатных дзеячаў сусветнай гісторыі і культуры.
На выстаўцы прадстаўлена больш за 80 дакументаў: кнігі, брашуры, перыядычныя выданні, мімеаграфаваныя матэрыялы. Большую частку экспазіцыі складаюць дакументы міжнародных арганізацый (ААН, ЮНВТО, ЮНЕСКА, Еўрапейскага саюза, Савета Еўропы) на рускай, французскай і англійскай мовах.
Экспазіцыя ўключае наступныя тэматычныя раздзелы:
- Прававое забеспячэнне міжнароднага турызму – міжнародныя рэкамендацыі і стандарты, нарматыўна-прававыя акты;
- Устойлівы турызм і ўстойлівае развіццё: роля і значэнне турызму ў эканамічным і сацыяльным развіцці кран і рэгіёнаў;
- Роля турызму ва ўмацаванні культурных сувязей, узаемапавагі і ўзаемаразумення паміж народамі;
- Эканоміка, геаграфія і арганізацыя міжнароднага турызму;
- Развіццё індустрыі турызму і турыстычнага бізнесу ў Рэспубліцы Беларусь.
Выстаўка будзе карысная спецыялістам у галіне турызму, арганізатарам турыстычнага бізнесу, студэнтам вышэйшых навучальных устаноў турыстычнага профілю, а таксама ўсім, хто цікавіцца міжнародным турызмам і любіць падарожнічаць.
Тэлефон для даведак: (8 017) 293 27 26.
Карысныя спасылкі:
- Турызм і МУР
- 2017 год – Міжнародны год устойлівага турызму ў мэтах развіцця
- Сусветны дзень турызму (27 верасня)
- Сусветны дзень турызму (ЮНВТО)
- Сусветная турыстычная арганізацыя пры ААН (ЮНВТО)
- Устойлівае развіццё турызму
- Статыстыка і турызм
- Турызм, ліквідацыя галечы і гендарная роўнасць
- Міністэрства спорту і турызму Рэспублікі Беларусь
- Рэспубліканскі саюз турыстычных арганізацый
- Федэральнае агенцтва па турызме Міністэрства культуры Расійскай Федэрацыі