З 11 лістапада па 6 снежня ў зале беларускай літаратуры (пам. 205) праходзіць юбілейная выстаўка “У віры імклівага жыцця”, прысвечаная 110-годдзю з дня нараджэння беларускага пісьменніка Міхася Зарэцкага (1901–1937).
Міхась Зарэцкі (Касянкоў Міхаіл Яўхімавіч) – пісьменнік яркага таленту і складанага, незвычайнага лёсу. Яго жыццё было кароткім, але ў творчых адносінах багатым і змястоўным.
Ён стаў адным з пачынальнікаў беларускай савецкай літаратуры. Таленавіты празаік і драматург, тонкі, праніклівы крытык, перакладчык, актыўны арганізатар літаратурна-грамадскага руху, Міхась Зарэцкі ўнёс вялікі ўклад у айчыннае літаратуразнаўства.
Творчая спадчына пісьменніка, улічваючы адпушчаныя яму на творчую дзейнасць усяго чатырнаццаць гадоў, багатая і жанрава разнастайная. Гэта – некалькі зборнікаў апавяданняў “У віры жыцця” (1925), “Пела вясна” (1925), “Пад сонцам” (1926), «"42 дакументы" і "Двое Жвіроўскіх"» (1926), “На чыгунцы” (1928), “Ракавыя жаронцы” (1930), аповесць “Голы звер” (1926), раманы “Сцежкі-дарожкі” (1928) і “Вязьмо” (1932), п’есы, нарысы, крытычныя артыкулы, пераклады. Яго выдатныя творы “Сцежкі-дарожкі” і “Вязьмо” выдаваліся і перавыдаваліся не адзін раз на беларускай і рускай мовах. Кнігі, прадстаўленыя на выстаўцы, дэманструюць шырокі творчы дыяпазон пісьменніка.
Размешчаныя ў экспазіцыі навуковыя працы вядомых айчынных літаратуразнаўцаў і моваведаў сведчаць аб тым, што мастацкая спадчына Міхася Зарэцкага і сёння выклікае вялікую цікавасць даследчыкаў.
Да ўвагі наведвальнікаў выстаўкі – біяграфічныя звесткі і артыкулы, прысвечаныя жыццю і творчасці аўтара.
Кантактны тэлефон: 293-27-16.