З 12 снежня па 7 студзеня ў зале беларускай літаратуры (пам. 205) праходзіць юбілейная выстаўка “Вачыма і сэрцам дзіцяці”, прысвечаная 90-годдзю вядомай беларускай пісьменніцы А.С. Васілевіч.
Творчасць Алены Сямёнаўны Васілевіч, кнігі якой выгадавалі не адно пакаленне беларусаў, цікавая і разнастайная. У айчыннай мастацкай літаратуры пісьменніца займае сваю нішу, мае свой аўтарскі голас, сваё індывідуальнае аблічча – непаўторнае, адметнае.
Яе немалы творчы скарб, прадстаўлены ў экспазіцыі, пацвярджае, што ў асобе Алены Васілевіч беларуская літаратура мае выдатнага майстра прозы, мастака-аналітыка, псіхолага, пісьменніцу, якая валодае багатай творчай фантазіяй, паэтычным бачаннем свету, тонкім адчуваннем слова, аўтара, што сваімі кнігамі ўзбагачае як літаратуру для дарослых, так і літаратуру для дзяцей і юнацтва.
Шырокаму колу чытачоў А. Васілевіч вядома як аўтар цыкла аповесцей “Расці, Ганька” (1966), “Доля знойдзе цябе“ (1968), “Новы свет” (1970), “Пачакай, затрымайся...” (1970), якія склалі тэтралогію “Пачакай, затрымайся...” (1972), што займае пачэснае месца сярод твораў, прадстаўленых на выстаўцы. Цыкл аповесцей можна назваць лірычнай біяграфіяй пісьменніцы і біяграфіяй цэлага пакалення, да якога яна належыць. Тэтралогія стаіць у шэрагу лепшых аўтабіяграфічных твораў беларускай літаратуры і для многіх стала любімай кніжкай дзяцінства.
Нельга не адзначыць аповесць “Шляхі-дарогі” (1950), кнігі апавяданняў “Блізкія знаёмыя” (1954), “Заўтра ў школу” (1956), “Сябры” (1958), “Апавяданні (1959), “Падслухала сэрца” (1960), “Калінавая рукавічка” (1963), “Я з вамі” (1964), “Пісар страявой часці” (1969), “Адно імгненне” (1975), “Шурка Рэмзікаў” (1985), зборнік апавяданняў і аповесцей “Мыс Добрай Надзеі” (1977), кнігі “Люблю, хвалююся – жыву” (1986), “Элегія” (1988), “Першая жонка нябожчыка” (2002), “Горкі ліпавы мёд” (2011), якія складаюць экспазіцыю.
Перакладзеныя на розныя мовы свету – рускую, балгарскую, англійскую, французскую, польскую, украінскую і іншыя – творы пісьменніцы сталі здабыткам славянскай і сусветнай літаратуры. У экспазіцыі яны размешчаны асобным блокам.
Хораша раскрылася і сама Алена Васілевіч у якасці перакладчыка. На выстаўцы можна знайсці яе пераклады на беларускую мову такіх вядомых твораў, як “Рабінзон Круза” Д. Дэфо, “Пароль – надзея” З. Васкрасенскай, “Зялёная мая калыска” Г. Башырава і многіх інш.
Больш падрабязна пазнаёміцца з творчасцю Алены Сямёнаўны Васілевіч, заслужанага работніка культуры Беларусі, лаўрэата Дзяржаўнай прэміі БССР, даведацца шмат цікавага з жыцця пісьменніцы можна, наведаўшы выстаўку.
Кантактны тэлефон: (8 017) 293 27 16.
 |
 |
 |
 |
 |
 |
