З 30 лістапада па 31 студзеня ў зале нотных і аўдыядакументаў (пам. 305) праходзіць юбілейная выстаўка “Вечна той жа, вечна новы”, прысвечаная 80-годдзю рускага кампазітара і піяніста Р.К. Шчадрына.
Уладальнік мноства званняў і ўзнагарод Радзівон Канстанцінавіч Шчадрын з’яўляецца адным з найбольш вядомых кампазітараў другой паловы ХХ ст. Валодаючы вострай сучаснай музычнай мовай, ён стварыў музыку, якая стала даступнай шырокаму кругу слухачоў.
Сярод кампазітараў свайго пакалення ён шырэй, чым хто-небудзь іншы, развіў у сваёй творчасці рускую тэматыку: яго оперы і балеты напісаны амаль выключна на сюжэты выдатных рускіх пісьменнікаў – М. Гогаля, А. Чэхава, Л. Талстога, У. Набокава, М. Ляскова. Ён аўтар шматлікіх музычных твораў, сярод якіх харавая руская літургія “Увасоблены анёл”, канцэрты для аркестра “Гарэзныя прыпеўкі”, “Звоны”, “Карагоды”, “Чатыры рускія песні” і інш.
Радзівон Шчадрын з выключнай вынаходлівасцю ўводзіць рускія элементы ў сваю музычную мову, узнаўляючы стыхіры, малітвы, прыпеўкі, пастуховыя найгрышы, перазвон, трэньканне балалайкі, цыганскую песню і г. д. У той жа час уся аўра яго твораў – тыпова сучасная: вастрыня дысанансных гукавых спалучэнняў, гульня прасторамі музычнай эстрады, прыём калажу і наватарскія спосабы выканання на ўсіх інструментах.
Наведвальнікі выстаўкі пазнаёмяцца з нотнымі зборнікамі твораў кампазітара, сярод якіх клавіры і партытуры опер і балетаў “Не толькі каханне” (1961), “Мёртвыя душы” (1977), “Чайка” (1980), “Дама з сабачкам” (1985), “Зачараваны вандроўнік” (2002), “Канёк-Гарбунок” (1960), “Кармэн-сюіта” (1967), “Ганна Карэніна” (1972). Шырока прадстаўлена сімфанічная музыка, сачыненні канцэртнага тыпу для розных інструментальных саставаў, аркестравыя сюіты, харавыя і вакальныя творы, сачыненні для фартэпіяна і інш.
Дапаўняюць экспазіцыю аўдыядакументы з фондаў Нацыянальнай бібліятэкі Беларусі, кнігі пра жыццё і творчасць Радзівона Канстанцінавіча, фатаграфіі. Усяго ж на выстаўцы прадстаўлена больш за 100 дакументаў.
Кантактны тэлефон: 8 (017) 293 27 52.