З 19 лістапада па 30 снежня 2009 года ў зале выяўленчых і відэадакументаў (пам. 307) праходзіць кніжна-ілюстрацыйная выстаўка “Вялікая скарбніца нацыі”.
Выстаўка прысвечана 70-годдзю з дня заснавання Нацыянальнага мастацкага музея Рэспублікі Беларусь.
Датай нараджэння музея можна лічыць 5 лістапада 1939 г. – менавіта тады адкрылася Дзяржаўная карцінная галерэя. У той час яе калекцыю складалі творы, сабраныя пасля грамадзянскай вайны ў першых музеях Мінска, Віцебска, Магілёва. У час Вялікай Айчыннай вайны вялікая частка экспанатаў была разрабавана і знішчана. Пасляваеннае адраджэнне галерэі звязана са шматгадовай дзейнасцю яе другога дырэктара А.В. Аладавай, якая аддавала ўсе сілы для аднаўлення калекцыі. У 1957 г. карцінная галерэя пераязджае ў новы будынак і атрымлівае статус Дзяржаўнага мастацкага музея БССР.
Сёння Нацыянальны мастацкі музей (сучасная назва з 1993 г.) добра вядомы не толькі ў Беларусі, але і за яе межамі. У яго экспазіцыі, філіялах і сховішчах знаходзіцца больш за 27 тыс. твораў, якія складаюць 20 разнастайных калекцый двух галоўных музейных збораў: нацыянальнага мастацтва і помнікаў мастацтва краін і народаў свету.
На выстаўцы прадстаўлена больш за 60 дакументаў: альбомы, кнігі, паштоўкі і рэпрадукцыі, артыкулы з перыядычных выданняў, якія раскрываюць гісторыю музея і расказваюць пра яго стваральнікаў М.П. Міхалапа, А.В. Аладаву, Ю.А. Карачуна.
Экспазіцыя разлічана на ўсе катэгорыі чытачоў, якія цікавяцца гісторыяй Нацыянальнага мастацкага музея.
Кантактны тэлефон: 293-27-58.