З 6 кастрычніка па 6 студзеня ў Нацыянальнай бібліятэцы Беларусі (3-ці паверх, кальцавы калідор) ладзіцца юбілейная выстаўка, прысвечаная 300-годдзю з дня нараджэння М.В. Ламаносава.
Міхаіл Васільевіч Ламаносаў (1711–1765) – выдатны рускі вучоны-прыродазнавец сусветнага значэння. Паэт, які заклаў асновы сучаснай рускай літаратурнай мовы, мастак і гісторык, прыхільнік развіцця айчыннай асветы, навукі і эканомікі, заснавальнік малекулярна-кінетычнай тэорыі. Буйны мысліцель. Адзін з ідэолагаў стварэння Маскоўскага ўніверсітэта (1755), названага ў яго гонар.
На выстаўцы, прысвечанай Міхаілу Васільевічу Ламаносаву, прадстаўлена каля 150 кніг, сярод якіх навуковыя працы, філасофскія сачыненні, зборнікі лірыкі, крытычныя матэрыялы пра навуковую і літаратурную дзейнасць знакамітага вучонага, біяграфічныя творы, а таксама літаратура па гісторыі навукі і культуры XVIII стагоддзя.
Экспазіцыя ўключае Поўны збор твораў Міхаіла Васільевіча Ламаносава, выпушчаны ў 10-ці тамах у 1957 годзе ў Маскве.
Цікавая кніга “Собрание сочинений известнейших русских писателей”, якая выйшла ў Маскве ў 1846 годзе. Выпуск першы гэтага збору твораў прысвечаны М.В. Ламаносаву.
Таксама на выстаўцы прадстаўлены выбраныя творы М.В. Ламаносава, выдадзеныя ў Санкт-Пецярбургу ў 1892 годзе.
У кнізе Валерыя Шубінскага “Михаил Ломоносов. Всероссийский человек” аўтар, выкарыстоўваючы архіўныя дакументы і гістарычныя даследаванні, імкнецца без ідэалізацыі ўзнавіць яркую, незвычайную асобу вучонага і пісьменніка ў кантэксце яго супярэчлівай эпохі.
На выстаўцы таксама прадстаўлена кніга Э.П. Карпеева “Русская культура и Ломоносов”, выпушчаная да 300-годдзя з дня нараджэння юбіляра, у якой аўтарам зроблена спроба зразумець ролю М.В. Ламаносава ў развіцці айчыннай культуры і навукі.
Кнігі, уключаныя ў экспазіцыю, дапамогуць чытачу, з аднаго боку, папоўніць веды пра аднаго з найвялікшых людзей Расіі, з другога, – скласці пра яго сваё ўласнае меркаванне.
Кантактныя тэлефоны: 293-28-86, 293-29-80.
Увага! У чытальных залах арганізаваны доступ да спісаў літаратуры даных юбілейных выставак. Скарыстацца спісамі можна з любога рабочага месца карыстальніка.