З 10 лістапада па 17 снежня ў Нацыянальнай бібліятэцы Беларусі (2-гі паверх, кальцавы калідор) праходзіць тэматычная кніжная выстаўка “За гранню рэальнасці: тлумачэнне невытлумачальнага”.
Свет, у якім мы жывём, складаны і разнастайны. Зараз становіцца зразумела, што патрабуецца вывучэнне непазнанага з выкарыстаннем усіх даступных чалавеку магчымасцей.
Ці будуць калі-небудзь разгаданы ўсе тайны, ці знойдзецца ім разумнае тлумачэнне?
Сабраныя за тысячагоддзі веды пра прыроду і велізарныя запасы энергіі выкапняў, якія сталі даступнымі, прывялі да фантастычнага росту вытворчых сіл. Радыё, тэлебачанне, вылічальныя машыны, выхад у космас, прыручэнне ядзернай энергіі, генная інжынерыя прадаставілі такія выгоды, пра якія нашы продкі маглі толькі марыць.
Гісторыя чалавецтва адзначана вялікім мноствам невытлумачальных з’яў, рэальнасць якіх доўгі час упарта аспрэчвалася і абвяргалася прадстаўнікамі прыродазнаўства.
Анамальныя зоны і кантакты з НЛА; таямнічыя смерчы і загадкі ўзнікнення цунамі; шаравыя маланкі; муміі і загадкавыя хрысціянскія святыні і прарокі; паранармальныя здольнасці чалавека; гіпотэзы, якія тлумачаць прыроду самых розных загадак і таямніц, – усе гэтыя тэмы атрымалі адлюстраванне ў раздзелах кніжнай выстаўкі, што прапануе захапляльныя падарожжы ў свет незвычайных, загадкавых і не разгаданых пакуль яшчэ з’яў.
Выстаўка складаецца з наступных раздзелаў:
- “Зямля загадкавая”;
- “Тыя, хто зазірнулі ў будучыню”;
- “За межамі штодзённай рэальнасці”;
- “Загадкавае і непазнанае”;
- “Неверагодныя магчымасці чалавека”;
- “Загадкавыя асобы”;
- “Дзеці індыга… яны не такія, як усе”.
У экспазіцыі сабраны вялізны матэрыял (каля 300 найноўшых выданняў), пазнаёміўшыся з якім, разумееш, як многа ў чалавеку і навакольным свеце таямнічага і загадкавага.
Кантактны тэлефон: 293-28-86.