Беларускія пісьменнікі таксама былі студэнтамі, але не заўсёды іх творчы шлях пачынаўся з філалагічных і журналісцкіх факультэтаў. Ці пазнаеце вы зорак беларускай класічнай і сучаснай літаратуры па іх нечаканых спецыяльнасцях, набытых у час студэнцтва?
Праверыць сябе можна, націснуўшы на карцінку.
1.
Гэты паэт, народжаны ў Беларусі больш за два стагоддзі таму, паступаючы у Віленскі ўніверсітэт, па рэкамендацыі знаёмага прафесара абраў фізіка-матэматычны факультэт. Аднак праз год ён перавёўся на аддзяленне славесных навук і прыгожых мастацтваў, а пасля сам выкладаў у Швейцарыі і Францыі. Хто ведае, убачылі б свет яго геніяльныя паэмы, калі б юнак не прамяняў добрую стыпендыю на заняткі па грэчаскай і рымскай літаратуры?
Адам Міцкевіч
2.
Вядомы беларускі пісьменнік і перакладчык XIX стагоддзя значную частку жыцця правёў у фальварку Люцынка, дзе займаўся творчасцю: перакладаў Адама Міцкевіча і кпіў з саслоўнай палітыкі Расійскай імперыі. Але мог стаць лекарам: будучы пісьменнік паступаў у Пецярбургскі ўніверсітэт на факультэт медыцыны, аднак студэнцкае жыццё прыйшлося прыпыніць з-за хваробы.
Вінцэнт Дунін-Марцінкевіч
3.
У гэтым жа стагоддзі паступіў вучыцца на медыка, але ўжо ў Маскву, іншы беларус, які пазней стаў пісьменнікам і журналістам. Аднак яго ўніверсітэцкае жыццё таксама было кароткім – юнака адлічылі за ўдзел у студэнцкіх забастоўках і рэвалюцыйных выступленнях. Якім кароткім і нестандартным псеўданімам ён падпісваўся?
Ядвігін Ш.
4.
А вось беларуская паэтка і актрыса, якая нарадзілася ў Гродзенскай вобласці больш за сто гадоў таму, і курсы медыцынскія ў Санкт-Пецярбургу скончыла, і фельчарам пад Вільняй паспела папрацаваць. Пасля гэтага дзяўчына вывучала ў Кракаве і Львове філасофію, філалогію і гісторыю. Як звалі гэтую шматгранную асобу?
Алаіза Пашкевіч (Цётка)
5.
Вядомы беларускі паэт з юных гадоў адчуваў, да чаго імкнецца яго душа, але з-за недахопу сродкаў і праблем са здароўем быў вымушаны вучыцца ў юрыдычным ліцэі ў Яраслаўлі. Свайму бацьку студэнт сказаў наступнае: “Пракурорам быць не хачу, не хачу ні адвакатам быць, ні суддзёй, хачу быць літаратарам або навукоўцам”. Вольны час ён праводзіў у бібліятэцы за чытаннем мастацкай літаратуры. Як звалі юнага аматара творчасці Адама Міцкевіча і Афанасія Фета?
Максім Багдановіч
6.
Спачатку будучы пісьменнік скончыў Гомельскі тэхнікум будаўнічых матэрыялаў і працаваў тэхнікам-тэхнолагам ў Польшчы. А пасля Вялікай Айчыннай вайны стаў студэнтам-завочнікам Гомельскага педагагічнага інстытута, паспеўшы да таго часу папрацаваць настаўнікам у сельскай мясцовасці. Росквіт яго творчай дзейнасці прыпаў на другую палову XX стагоддзя. Яго дачка стала вучоным, займаецца вывучэннем беларускай літаратуры і выкладае ў БДУ. Пра якога класіка ідзе гаворка?
Іван Шамякін
7.
Бацькі хацелі, каб ён стаў хірургам, а вось сам юнак бачыў сябе студэнтам гістарычнага факультэта Беларускага дзяржаўнага ўніверсітэта. Туды ён і паступіў. Цяпер наш сучаснік вызначае свой статус так – “пісьменнік з дыпломам гісторыка”. Пра каго ідзе гаворка?
Уладзімір Арлоў
8.
Мы ведаем яго як папулярнага пісьменніка і паэта, але за плячыма ў яго не толькі літаратурнае жыццё. Гэты аўтар шматлікіх твораў быў студэнтам Мінскага мастацкага вучылішча і Беларускага тэатральна-мастацкага інстытута, што дазволіла яму стаць шматграннай асобай. У 90-я гады ХХ стагоддзя ён разам з братам пісаў працяг рамана “Знесеныя ветрам” і кнігі па вядомых амерыканскіх серыялах.
Адам Глобус
9.
Ён з ранняга ўзросту ведаў, што хоча займацца літаратурнай творчасцю, таму студэнцкія гады правёў на факультэце журналістыкі Беларускага дзяржаўнага універсітэта. Але на гэтым пісьменнік і публіцыст не спыніўся і ў 2008 годзе ў Літве атрымаў ступень доктара навук па гісторыі мастацтваў за даследаванне віцебскага авангарда. Пасля гэтага выдаў манаграфію пра Марка Шагала, якую раскупілі гэтак жа хутка, як і яго папулярныя раманы пра беларускае жыццё.
Віктар Марціновіч
10.
Сучасная беларуская пісьменніца ў жанры фэнтэзі заваявала рускамоўную публіку сваімі гісторыямі пра студэнтку Школы магіі і прыгоды касмічных мікрабіёлагаў. Аб жыцці спецыялістаў, якія вывучаюць мікраскапічныя арганізмы, аўтар ведае не па чутках – сама вучылася на біяфаку Беларускага дзяржаўнага ўніверсітэта і некаторы час працавала па спецыяльнасці. Што за пісьменніца пакінула лабараторны халат дзеля літаратурнай творчасці?
Вольга Грамыка
Тэст падрыхтаваны аддзелам суправаджэння інтэрнэт-партала.
