19 студзеня а 17-й гадзіне ў галерэі “Ракурс” Нацыянальнай бібліятэкі Беларусі адбудзецца ўрачыстае адкрыццё IV Міжнароднага фестывалю пейзажа, прысвечанага Віталю Цвірку.
Пейзажы знакамітага беларускага майстра, народнага мастака Віталя Цвіркі адрозніваюцца незвычайнай віртуознасцю, своеасаблівым мастацкім бачаннем. Яго творы сталі этапнымі для беларускага мастацтва, таму яго іменем названы Міжнародны фестываль пейзажу, які праводзіцца ў Нацыянальнай бібліятэцы ўжо ў чацвёрты раз.
Фестываль закліканы раскрыць новыя перспектывы жанру, яго патэнцыял, здольнасць увесь час абнаўляцца, адкрываць магчымасці для пошуку і эксперыментаў.
У экспазіцыі свае работы прадставяць акварэлісты, жывапісцы, майстры фотамастацтва і графікі. На вернісажы будзе дэманстравацца дакументальны фільм пра народнага мастака, уступнае слова скажуць паслядоўнікі вялікага майстра.
Выстаўка ладзіцца ў галерэях “Ракурс” і “Лабірынт” Нацыянальнай бібліятэкі Беларусі да 11 лютага 2010 г.
Тэлефоны для даведак: 293-27-67, 293-28-23.
Е-mail: pr@nlb.by