22 красавіка а 17-й гадзіне ў галерэі “Панарама” (22-гі паверх) адбудзецца ўрачыстае адкрыццё мастацкай выстаўкі “Дарогамі Тараса Шаўчэнкі”.
Выстаўка праводзіцца Нацыянальнай бібліятэкай Беларусі сумесна з Пасольствам Украіны ў Рэспубліцы Беларусь і прымеркавана да 195-годдзя з дня нараджэння выдатнага ўкраінскага паэта і мастака Тараса Рыгоравіча Шаўчэнкі.
Мастацкая выстаўка – вынік работы пастаянна дзеючай творчай экспедыцыі мастакоў львоўскага Палаца мастацтваў. Па тэрыторыі Украіны мастакі пераадолелі 9 тыс. км, пабылі ў Літве, Казахстане, Расіі, у прыватнасці, у Маскве і Санкт-Пецярбургу, а ў чэрвені 2008 года наведалі Беларусь. У час гэтага падарожжа было напісана больш за 100 палотнаў.
Некаторыя з мастакоў-удзельнікаў экспедыцыі па месцах, дзе даводзілася бываць Тарасу Шаўчэнку, прымуць удзел у мастацкай выстаўцы ў Нацыянальнай бібліятэцы Беларусі. Да ўвагі наведвальнікаў будуць прадстаўлены жывапісныя і фотаработы, а таксама філатэлічныя стэнды, прысвечаныя Т. Шаўчэнку. У галерэі “Ракурс” будзе аформлена кніжная кампазіцыя, у якую ўвойдуць дакументы з фондаў Нацыянальнай бібліятэкі, што раскрываюць вобраз Шаўчэнкі як мастака і паэта.