15 красавіка ў галерэі “Лабірынт” прайшло ўрачыстае адкрыццё выстаўкі “Арт-крок”.
Правядзенне выстаўкі “Арт-крок” у Нацыянальнай бібліятэцы Беларусі стала добрай традыцыяй: тут яна ладзіцца ўжо ў дзявяты раз. Пра гісторыю стварэння праекта і яго развіццё расказала гасцям пад час урачыстасці першы намеснік дырэктара Нацыянальнай бібліятэкі Беларусі Алена Далгаполава. Яна павіншавала ўдзельнікаў з адкрыццём выстаўкі і адзначыла, што экспазіцыя выклікае ў яе як гледача неймаверную колькасць прыемных эмоцый.
Выстаўка размясцілася ў галерэях “Ракурс” і “Лабірынт” на другім і трэцім паверхах бібліятэкі. Акрамя традыцыйнага ўдзелу членаў Міжнароднай гільдыі жывапісцаў, сёлета ў “Арт-кроку” ўдзельнічаюць члены Саюза мастакоў Беларусі, спецыяльна запрошаны мастакі і фотамастакі, якія прадстаўляюць на суд свае работы, выкананыя ў 2013 і 2014 гадах. Такі падыход дае магчымасць самага непасрэднага знаёмства з жывым творчым працэсам і дазваляе прасачыць развіццё найноўшых мастацкіх тэндэнцый, што цікава як аматарам і знаўцам мастацтва, так і шырокаму колу гледачоў.
“Ужо шмат гадоў я назіраю за гэтым праектам і заўсёды бачу крок да нейкіх новых вяршыняў мастацтва. Гляджу на творы вядомых мне мастакоў і нібы зноў адкрываю для сябе іх творчасць”, – адзначыла пад час мерапрыемства мастацкі крытык Ларыса Фінкельштэйн.
У выстаўцы прымаюць удзел каля 30 беларускіх творцаў. Сярод іх ёсць і тыя, хто яшчэ толькі пачынае свой творчы шлях, і мастакі, імёны якіх добра вядомы беларускаму гледачу. Гэта Зміцер Сурыновіч, Алесь Забаўчык, Уладзімір Кожух, Мікалай Бушчык, Уладзімір Рынкевіч, Андрэй Плясанаў, Вадзім Качан, Віктар Суглоб і іншыя.
Тэлефон для даведак: (8 017) 293 27 56, 293 79 80.
Е-mail: pr@nlb.by
Чытайце таксама:
