24 лістапада ў галерэі "Панарама" Нацыянальнай бібліятэкі Беларусі ў межах фестывалю мастацтва “Арт-Мінск 2020” пачала работу аднайменная мастацкая выстаўка.
З прывітальнымі словамі да прысутных і ўдзельнікаў выстаўкі звярнулася першы намеснік генеральнага дырэктара Нацыянальнай бібліятэкі Алена Далгаполава.
У мерапрыемстве таксама прынялі ўдзел першы намеснік старшыні грамадскага аб’яднання “Беларускі саюз мастакоў” Наталля Шаранговіч і намеснік старшыні грамадскага аб’яднання “Беларускі саюз мастакоў” па творчай рабоце Андрэй Басалыга.
Бібліятэка ўжо трэці раз далучаецца да фестывалю мастацтва. Як і ў мінулыя гады “Арт-Мінск” аб’ядноўвае некалькі выставачных пляцовак Мінска ў розных частках горада, на некаторы час ператвараючы іх у адну вялікую і яскравую прастору.
У гэтым годзе ў Палацы мастацтва падчас адкрыцця фестывалю “Арт-Мінск” пачалі працаваць яшчэ два яркія праекты, аб’яднаныя арт-фестывалем: I трыенале жывапісу, графікі і скульптуры Беларускага саюза мастакоў “VIVAT VITA” і выставачны праект “Графіка года”.
Арганізатары праектаў – Нацыянальная бібліятэка Беларусі, Беларускі саюз мастакоў, Рэспубліканская мастацкая галерэя “Палац мастацтва”, Цэнтр выяўленчага і медыямастацтва “Новая культурная ініцыятыва” пры падтрымцы ААТ “Газпром трансгаз Беларусь”.
А наведвальнікаў галерэі “Панарама” чакаюць лепшыя і найбольш арыгінальныя творы вядомых майстроў Мінска і іншых гарадоў Беларусі ў разнастайных напрамках, жанрах і тэхніцы.
Запрашаем атрымаць асалоду ад мастацтва ў галерэі “Панарама” (22-гі паверх).
Выстаўка “Арт-Мінск 2020” будзе доўжыцца да 11 студзеня 2021 г.
Дата яе заканчэння можа быць зменена.
Уваход складае кошт наведвання агляднай пляцоўкі.
Па рашэнні Мінгарвыканкама № 1069 масавыя мерапрыемствы рэкамендуецца наведваць толькі ў масках і іншых індывідуальных сродках абароны.
Пераканаўча просім наведвальнікаў прыходзіць на выстаўку ў масках!
Матэрыял пададзены аддзелам сувязей з грамадскасцю.