4 мая ў галерэі “Ракурс” (2-гі паверх) у межах Міжнароднага фестывалю сучаснага мастацтва адкрылася выстаўка “Арт-Мінск – 2018”.
Маштабны фестываль “Арт-Мінск” аб’яднаў найбуйнейшыя выставачныя пляцоўкі сталіцы адзінай мэтай – падарыць яе жыхарам і гасцям асалоду ад мастацтва. У праекце прымаюць удзел 18 мінскіх культурных устаноў, у тым ліку і Нацыянальная бібліятэка Беларусі. Сваё жаданне ўдзельнічаць выказалі як новыя, так і сталыя культурныя інстытуцыі сталіцы: Рэспубліканская мастацкая галерэя (Палац мастацтва), Нацыянальны цэнтр сучасных мастацтваў Рэспублікі Беларусь, Мемарыяльны музей-майстэрня З.І. Азгура, Беларуская дзяржаўная акадэмія мастацтваў, мастацкая галерэя “БелАрт”, галерэі “Ў”, A&V, “ДК”, “Арт-Порт”, Blique, “Прадмесце” і інш. Так, на адзін месяц горад ператварыўся ў велізарную галерэю з бясконцым мноствам разнапланавых работ беларускіх і замежных майстроў – ад эпатажных і мудрагелістых да рэалістычных і стрыманых. Увогуле, на любы густ.
Колькасць заявак на ўдзел у фестывалі перавысіла 800 анкет. На выстаўцы прадстаўлены тыя працы, якія прайшлі папярэдні адбор.
Насычаная экспазіцыя ў галерэі бібліятэкі прапануе ўвазе наведвальнікаў работы вядомых майстроў розных пакаленняў і з розных гарадоў Беларусі. Прадстаўлены работы жывапісцаў Мікалая Кірэева, Алены Бараноўскай, Анатоля Отчыка. Экспануюцца тонкія каларысты, якія працуюць у жанры нацюрморта, Сямён Дамарад і Марыя Ісаёнак; лірычны ў сваіх камерных сюжэтах Сяргей Пісарэнка і эфектны Алег Усціновіч; дэкаратыўныя і тэхнічныя Маргарыта і Уладзімір Голубевы.
Мастакі з Віцебска Галіна Васільева і Віктар Нікалаеў сваімі працамі нагадаюць пра традыцыі горада, які шырока вядомы ў сусветнай культурнай гісторыі як “віцебская школа”.
Маладое пакаленне ў беларускім мастацтве прадстаўлена такімі постацямі, як Павел Ксяндзоў, Антон Радзівонаў, Вікторыя Савянкова, Наталля Шкраба, Юрый Пеўнеў. Яны ўжо паспелі запомніцца гледачам па ўдзеле ў шматлікіх выставачных праектах, такіх як “Восеньскі салон з Белгазпрамбанкам”. Іх працы вылучаюцца не толькі тэхнічным майстэрствам, але і арыгінальным, часта парадаксальным аўтарскім поглядам. Сярод маладых мастакоў нельга не згадаць і такіх прадаўжальнікаў рэалістычнай традыцыі ў сваёй маляўнічай творчасці, як Антон Вырва, Міхаіл Крот, Дар'я Сумарава-Копач. Графіка прадстаўлена фарматнымі акварэльнымі працамі Любові Абрамавай і камернымі афортамі Марыны Жвірблі.
Сярод скульптурных работ вылучаюцца віртуозная ў тэхнічным выкананні бронза ад Паўла Лука, а таксама дробная пластыка ад Сяргея Аганава – аўтара манументальных кампазіцый на гістарычную тэму, якія ўпрыгожваюць вуліцы і плошчы Мінска.
Распачаўся вернісаж з прывітальных слоў першага намесніка дырэктара Нацыянальнай бібліятэкі Беларусі Алены Далгаполавай. У адкрыцці выстаўкі ўзялі ўдзел дырэктар Рэспубліканскай мастацкай галерэі Аляксандр Зінкевіч і дырэктар Цэнтра выяўленчага і медыямастацтва “Новая культурная ініцыятыва”, куратар карпаратыўнай калекцыі Белгазпрамбанка і праекта “Арт-Беларусь” Аляксандр Зіменка.
Далучыцца да фестывалю “Арт-Мінск” і пазнаёміцца з экспазіцыяй у Нацыянальнай бібліятэцы запрашаем да 20 мая 2018 года.
Дата завяршэння работы выстаўкі можа быць зменена.
Час работы выстаўкі адпавядае рэжыму работы бібліятэкі.
Уваход на выстаўку – па чытацкім білеце або білеце сацыякультурнага цэнтра бібліятэкі.
Тэлефоны для даведак: (8 017) 266 37 37, 293 28 23.
Е-mail: pr@nlb.by