23 красавіка ў галерэі “Ракурс” (2-гі паверх) адбылося адкрыццё персанальнай выстаўкі Марыны Эльяшэвіч “Азербайджан вачамі беларускай мастачкі”.
Мастацкія работы, прадстаўленыя на выстаўцы, перадаюць духоўнае багацце, прыгажосць, шчодрасць нацыянальнага характару азербайджанцаў. Сярод іх вялікая ўвага надаецца выявам дзяўчат і жанчын, якія трапятліва захоўваюць нацыянальныя традыцыі ў адзенні, любяць прыроду сваёй радзімы, яе песні і танцы, умеюць працаваць і адпачываць. Выявы сучасніц дапаўняюць цудоўныя гераіні з найпапулярнейшай казачнай гісторыі “Тысяча і адна ноч”. Гэта невычэрпная тэма таксама падтрымліваецца малюнкамі беларускіх дзяўчат, што дазваляе паказаць блізкасць, тонкае падабенства агульных рыс сапраўднай жаночай прыгажосці, якая заключаецца ў духоўнай чысціні і ўзвышанасці пачуццяў.
З вялікім натхненнем Марына Эльяшэвіч перадае непаўторныя абрысы сусветна вядомых помнікаў азербайджанскай архітэктуры розных стагоддзяў. Яны з'яўляюцца сапраўднай візітнай карткай дружалюбнай краіны.
У жанры нацюрморта адлюстроўваецца багацце колераў і пладоў азербайджанскай зямлі: хурма, вінаград, гранаты, цвіценне пладовых дрэў, ружы, гваздзікі, кветкі гор і далін.
У стварэнні сваіх работ аўтар выкарыстоўвае тэхніку далёкаўсходняга жывапісу на рысавай паперы пры дапамозе спецыяльных пэндзляў рознага памеру, кітайскай тушы і мінеральных фарбаў.
Творы, прадстаўленыя на выстаўцы “Азербайджан вачамі беларускай мастачкі”, вылучаюцца асаблівай яркасцю і свежасцю пачуццяў, гарачым жаданнем падзяліцца сваімі азербайджанскімі ўражаннямі і адкрыццямі з гледачамі.
Гэта змястоўная і займальная выстаўка спрыяе міжнароднаму дыялогу культур паміж Азербайджанскай Рэспублікай і Рэспублікай Беларусь, у аснове якога – вялікая дружба, якая склалася на працягу стагоддзяў паміж нашымі народамі.
Выстаўка будзе працаваць да 27 мая.
Тэлефоны для даведак: (8 017) 293 28 33, 293 27 56.
Е-mail: pr@nlb.by
 |
 |
 |
 |
 |
 |
