У галерэі “Ракурс” (2-гі паверх) адкрылася выстаўка жывапісу Рыгора Іванова “Калядныя званы”.
Пералівісты звон – сімвал надыходзячых зімовых святаў. Гледзячы на званочкі, напісаныя Рыгорам Івановым, відавочна: яны дакладна адпужваюць усё кепскае і прадказваюць толькі самае светлае.
У адкрыцці выстаўкі ўзялі ўдзел першы намеснік дырэктара Нацыянальнай бібліятэкі Беларусі Алена Далгаполава, старшыня Беларускага саюза мастакоў, мастак, паэт Рыгор Сітніца, беларускі мастак, член Беларускага саюза мастакоў Рыгор Іваноў, беларускі мастацтвазнаўца, арт-крытык, арт-дырэктар аўтарскай некамерцыйнай канцэптуальнай галерэі “Брама”, член Беларускага саюза мастакоў і Беларускага саюза дызайнераў Ларыса Фінкельштэйн.
Унікальны стыль Рыгора Іванова скарыў сэрцы гасцей – настолькі чароўныя яго анёлы, коні, козы, званочкі, нябесныя целы. Дарэчы, уласную тэхніку аўтар так і назваў – “святызм”, бо ўсе яго персанажы і аб'екты на карцінах выглядаюць так, быццам свецяцца знутры, асвятляючы палатно і вабячы наведвальнікаў выстаўкі ў атмасферу ўтульнасці і цяпла.
Матэрыял прадстаўлены аддзелам сувязей з грамадскасцю.
