5 сакавіка ў галерэі “Лабірынт” адбылося ўрачыстае адкрыццё мастацкай выстаўкі “Кветкавы рай VI”.
Правядзенне выстаўкі “Кветкавы рай” стала ўжо добрай традыцыяй. У шосты раз праект радуе наведвальнікаў разнастайнасцю цікавых работ у галіне жывапісу, графікі і фатаграфіі, асноўнымі персанажамі якіх з’яўляюцца кветкі. Сёлета экспазіцыя налічвае каля 60 творчых прац.
“Кветкавы рай” задумваўся як праект-віншаванне, каб напярэдадні вясновых святаў нагадаць гледачу пра хуткае абуджэнне прыроды. Але з прыродай абуджаюцца і людзі. Як адзначыў пад час адкрыцця выстаўкі намеснік дырэктара Нацыянальнай бібліятэкі Беларусі Аляксандр Суша, вясна – гэта час, калі мы ўспрымаем навакольныя з’явы ў іншым святле. Ён распавёў прысутным аб праекце, яго вытоках і значнасці для пераемнасці мастацкіх традыцый.
У сваю чаргу мастакі Дзмітрый Сурыновіч і Мікалай Бушчык, чые работы занялі пачэснае месца сярод экспанатаў выстаўкі, разважалі аб значэнні мастацтва і яго вытоках. Нямала слоў было прысвечана галоўным гераіням экспазіцыі – кветкам. «Няма мастака, які прысвяціў бы ўсю сваю творчасць кветкам, але няма і мастака, які хоць аднойчы не дакрануўся б да гэтай тэмы», – адзначыў пад час урачыстасці мастак Уладзімір Рынкевіч. Сапраўды, фактычна няма той творчай асобы, хто не звяртаўся б да вобраза кветкі ці то ў нацюрмортах, ці то ў пейзажах, а часта і ў паўабстрактных сімвалічных кампазіцыях. Прыгажосць гэтага стварэння прыроды нікога не пакідае абыякавым.
Кветкі прыўносяць у нашу штодзённасць радасць, пяшчоту і феерверк колераў. Яны, як і сапраўднае мастацтва, робяць наша жыццё больш яркім, светлым і шчаслівым. З гэтым згадзілася і арт-крытык Ларыса Фінкельштэйн. Яна расказала пра вядомыя імёны сярод аўтараў экспанатаў і мастацкія вобразы як фундамент мастацкіх твораў, павіншавала прысутных жанчын з надыходзячым вясновым святам.
З экспазіцыяй можна пазнаёміцца ў галерэі “Лабірынт” на трэцім паверсе бібліятэкі.
Тэлефоны для даведак: (8 017) 293 27 56, 293 78 33.
Е-mail: pr@nlb.by
Чытайце таксама: