Правядзенне выстаўкі “Кветкавы рай” стала ўжо добрай традыцыяй. У сёмы раз праект радуе наведвальнікаў разнастайнасцю цікавых работ у галіне жывапісу, графікі і фатаграфіі, асноўнымі персанажамі якіх з’яўляюцца кветкі.

“Кветкавы рай” задумваўся як праект-віншаванне, каб напярэдадні вясновых святаў нагадаць гледачу пра хуткае абуджэнне прыроды.

Адкрыла выстаўку першы намеснік дырэктара Нацыянальнай бібліятэкі Беларусі Алена Далгаполава, якая расказала прысутным пра праект, яго вытокі і значнасць для пераемнасці мастацкіх традыцый.

У сваю чаргу член Беларускага саюза мастакоў пісьменніца Ірына Кузняцова павіншавала прысутных з надыходзячым жаночым святам 8 Сакавіка і прачытала гасцям свой верш “Любовь женщины”. Мастачка Дзіяна Каласовіч разважала пра значэнне мастацтва. Нямала слоў было прысвечана галоўным гераіням экспазіцыі – кветкам. Мастацтвазнаўца Таццяна Бембель у сваёй прамове адзначыла: “Выстаўка – гэта шлях да пазнання такога прыроднага цуда, як кветка. Мова кветак – мова кахання”. Прыгажосць гэтага стварэння прыроды нікога не пакідае абыякавым. Фактычна няма той творчай асобы, якая б не звярталася да вобраза кветкі ці то ў нацюрмортах, ці то ў пейзажах, а часта і ў паўабстрактных сімвалічных кампазіцыях. Кветкі прыўносяць у нашу штодзённасць радасць, пяшчоту і феерверк колераў. Яны, як і сапраўднае мастацтва, робяць наша жыццё больш яркім, светлым і шчаслівым.

У рамках прэзентацыі ўвазе гасцей была прадстаўлена выстаўка-прагляд выданняў, прысвечаных кветкам.

Лірычны настрой мерапрыемства падтрымалі навучэнцы дзіцячай школы мастацтваў № 1 г. Мінска, а таксама выканаўца ўсходніх танцаў Аліна Фядулава і cпявачка Вераніка Цубікава.

З экспазіцыяй можна азнаёміцца ў галерэях “Лабірынт” (3-ці паверх) і “Ракурс” (2-гі паверх).

Тэлефоны для даведак: (8 017) 293 27 56, 293 78 33.

Е-mail: pr@nlb.by