30 студзеня ў Нацыянальнай бібліятэцы Беларусі адбылося ўрачыстае адкрыццё дабрачыннага мастацкага праекта “Свет за акном”.
Удзел у праекце прымаюць спецыяльныя дзяржаўныя ўстановы для людзей з абмежаванымі магчымасцямі. На вернісажы іх падапечныя прадэманстравалі свае таленты.
Так, Мінская абласная дзяржаўная спецыяльная агульнаадукацыйная школа-інтэрнат для дзяцей з парушэннем слыху прадставіла музычны нумар у жэставым выкананні, псіханеўралагічны інтэрнат № 2 – музычную кампазіцыю ансамбля “Аляксандр бэнд”, а дом-інтэрнат для дзяцей-інвалідаў з асаблівасцямі псіхафізічнага развіцця правёў паказ мультыплікацыйных фільмаў студыі “Мы ёсць” і выканаў тэатральныя эцюды.
З прывітальным словам на адкрыцці праекта “Свет за акном” выступілі: намеснік дырэктара па абслугоўванні карыстальнікаў і ідэалогіі Алена Далгаполава, старшыня грамадскага аб’яднання “Міжнародная гільдыя жывапісцаў” Фёдар Ястраб, кіраўнік выяўленчай студыі “Надзея” псіханеўралагічнага інтэрната № 2 Таццяна Біруля, старшыня ўпраўлення адукацыі Мінскага аблвыканкама Ніна Віктароўская, дырэктар Мінскай абласной дзяржаўнай школы-інтэрната для дзяцей з парушэннем слыху Іна Волчак, супрацоўнік дома-інтэрната для дзяцей-інвалідаў з асаблівасцямі псіхафізічнага развіцця манахіня Марфа.
Галоўная ідэя праекта ў тым, што па волі лёсу некаторыя з нас маюць абмежаваныя магчымасці фізічнага і псіхічнага кшталту, але гэтыя абставіны могуць паспяхова пераадольвацца неабмежаванымі магчымасцямі творчага пошуку. Варта толькі грамадству не цурацца такіх праблем, а дапамагаць сваім “асаблівым” грамадзянам рэалізоўваць іх творчы патэнцыял на карысць усім.
Выстаўка будзе працаваць да 22 лютага 2013 г. у галерэі "Лабірынт".
Тэлефоны для даведак: (8 017) 293 28 23, 293 27 67.
Е-mail: pr@nlb.by