30 студзеня 2008 года а 17-ай гадзіне ў галерэі «Ракурс» Нацыянальнай бібліятэкі Беларусі адбылося ўрачыстае адкрыццё міжнароднай мастацкай выстаўкі “Усе стыхіі”.
З даўніх часоў людзі ўспрымалі жыццё па прынцыпе чатырох частак: чатыры бакі свету, чатыры стыхіі. Асабліва шмат увагі стыхіям надаюць мастакі, якія ствараюць выявы, перадаюць свае пачуцці пры дапамозе розных тэхнік: жывапісу, акварэлі, батыка, графікі, фота. Назіральны глядач можа адзначыць у іх творах шырокую палітру выяўленчых магчымасцей сучаснага мастацтва – адмысловую пластыку, цікавыя аўтарскія тэхнікі, нечаканыя кампазіцыйныя хады, своеасаблівае адчуванне колеру. Таму выстаўка «Усе стыхіі» прысвечана не толькі прыродным з’явам, але і стыхіі пачуццяў, стыхіі матэрыялаў.
На вернісажы прадстаўлены больш за 130 прац. Сярод запрошаных удзельнікаў – каля 80 мастакоў з розных краін свету: Расіі, Украіны, Нарвегіі і інш. Шматлікія майстры – удзельнікі выстаўкі – добра вядомыя не толькі ў сябе на Радзіме, але і за яе межамі, як, напрыклад, Аляксандр Родзін, Фёдара Ястраб, Віктар Ціханаў і шматлікія іншыя.
Экспазіцыя разлічаная на ўсіх, хто цікавіцца сучасным мастацтвам.
Выстаўка будзе працаваць да 3 сакавіка.
Кантактныя тэлефоны 293-27-67, 293-28-23
 |
 |
 |
