31 студзеня ў бібліятэцы адбылося адкрыццё мастацкага праекта “Свет мастацтва”, падрыхтаванага выкладчыкамі Беларускага дзяржаўнага педагагічнага ўніверсітэта імя Максіма Танка (БДПУ).
Актыўная пазіцыя і пастаяннае самаўдасканаленне – залог поспеху любога выкладчыка. Асабліва калі гэты педагог – мастак. Праект “Святло мастацтва” для супрацоўнікаў кафедры мастацка-педагагічнай адукацыі факультэта эстэтычнай адукацыі БДПУ – выдатная магчымасць для самавыяўлення, абмену вопытам і назапашанымі ведамі.
На адкрыцці праекта выступіла загадчыца аддзела галерэйна-выставачнай дзейнасці Нацыянальнай бібліятэкі Беларусі Вольга Давідовіч. Яна расказала пра сумесныя праекты з супрацоўнікамі ўніверсітэта і падзякавала педагогам-мастакам за іх уклад у беларускае мастацтва.
Загадчыца кафедры мастацка-педагагічнай адукацыі БДПУ імя Максіма Танка, кандыдат мастацтвазнаўства, дацэнт Аксана Коўрык павіншавала калег з адкрыццём мастацкага праекта і падзякавала Нацыянальнай бібліятэцы за цёплую атмасферу і плённае супрацоўніцтва.
Сярод выступоўцаў былі таксама дацэнт кафедры мастацка-педагагічнай адукацыі БДПУ імя Максіма Танка, член Беларускага саюза дызайнераў Павел Кашэўскі і прафесар кафедры мастацка-педагагічнай адукацыі БДПУ імя Максіма Танка, член Беларускага саюза мастакоў, член Студыі ваенных мастакоў Міністэрства абароны Рэспублікі Беларусь Георгій Лойка.
Госці змаглі падрабязна азнаёміцца з сучаснымі творамі жывапісу, дэкаратыўна-прыкладнога мастацтва, дызайну адзення і графічнага дызайну.
Наведаць экспазіцыю можна да 10 мая 2019 г.
Дата заканчэння выстаўкі можа быць зменена.
З 1 лютага 2019 г. уваход на выстаўку ў галерэі “Панарама” (22-гі паверх) складае кошт наведвання агляднай пляцоўкі.
Час работы выстаўкі адпавядае рэжыму работы агляднай пляцоўкі.
Тэлефоны для даведак: (8 017) 266 37 37, 293 28 33, 293 28 81.
Е-mail: pr@nlb.by
Матэрыял падрыхтаваны аддзелам сувязей з грамадскасцю.
