30 лістапада ў бібліятэцы пачала працу выстава “Пераадоленне стыгмы”, прымеркаваная да Сусветнага дня барацьбы са СНІДам (1 снежня).
У экспазіцыі – работы, якія занялі прызавыя месцы, а таксама адзначаныя дадатковымі заахвочвальнымі прызамі рэспубліканскага конкурсу “Фарміраванне талерантнага стаўлення да людзей, якія жывуць з вірусам імунадэфіцыту чалавека. Пераадоленне стыгмы і недапушчэнне дыскрымінацыі”. Конкурс праводзіўся Міністэрствам аховы здароўя Рэспублікі Беларусь.
Аўтары конкурсных работ – школьнікі, студэнты, хатнія гаспадыні, эканамісты, менеджары, урачы і іншыя жыхары з усіх рэгіёнаў Беларусі, самаму малодшаму з якіх 10, а старэйшай – 52.
Дапаўняюць экспазіцыю даведачная, навуковая, навукова-папулярная літаратура і артыкулы ў перыядычных выданнях з фонду Нацыянальнай бібліятэкі Беларусі, прысвечаныя актуальным пытанням віруса імунадэфіцыту чалавека, сучаснай тактыцы лячэння, а таксама сацыяльна-псіхалагічным, маральна-прававым і маральным аспектам ВІЧ-інфекцыі.
Выстава дазволіць прыцягнуць увагу да праблемы, развеяць міфы і выкараніць ілжывыя ўяўленні аб захворванні.
Арганізатары – Нацыянальная бібліятэка Беларусі і Рэспубліканскі цэнтр гігіены, эпідэміялогіі і грамадскага здароўя.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Выстава будзе працаваць да 1 лютага 2022 г. у галерэі “Мабільная” (3-ці паверх).
Дата яе заканчэння можа быць зменена.
