29 мая адбылося адкрыццё выстаўкі мастацкіх работ навучэнцаў заслужанага аматарскага калектыву Рэспублікі Беларусь “Народная студыя выяўленчага мастацтва” Цэнтра дадатковай адукацыі дзяцей і моладзі “АРТ”.
Студыяй кіруе вядомы беларускі мастак Рышард Май. Падзея прымеркавана да Дня абароны дзяцей.
Шчырасць, спантаннасць, прыроджанае пачуццё гармоніі, ніякіх забарон і гатовых выяўленчых прыёмаў – у атмасферы абсалютнай творчай свабоды спасцігаюць мастацтва юныя вучні ўнікальнай мастацкай студыі Рышарда Мая. Пад яго кіраўніцтвам маленькія мастакі не засвойваюць вядомыя гатовыя навыкі, а нанава, у яркім аўтарскім каларыце акрываюць іх на ўласным вопыце, вырашаючы творчыя задачы. Радасць ад такіх адкрыццяў не параўнальная ні з чым, яна дорыць дзіцяці адчуванне самастойнасці, умацоўвае ўпэўненасць у сваіх сілах і здольнасцях. У студыі займаюцца малышы ад трох гадоў, і гэтыя крошкі ўжо к 7–12 гадам ствараюць дзівосныя рэчы! Дзіцячыя работы не толькі сапернічаюць з “дарослым” жывапісам, але часта пераўзыходзяць яго па змесце або выяўленчай форме, выразнасці або спектры прыёмаў.
Студыя, якая існуе з 1978 года, з цягам часу была ўдастоена званняў “народнай” і “заслужанай”, а ў мастацкіх кругах загаварылі пра “феномен студыі Рышарда Мая”. Работы студыйцаў прымалі ўдзел у шматлікіх выстаўках і станавіліся прызёрамі міжнародных конкурсаў у Анголе, Арменіі, Бельгіі, Балгарыі, Галандыі, Ізраілі, Індыі, Македоніі, Новай Гвінеі, Польшчы, Партугаліі, Расіі, Тайвані, Фінляндыі, Францыі, Чэхіі, Японіі і на Мадагаскары.
Выстаўка да Дня абароны дзяцей у Нацыянальнай бібліятэцы Беларусі прадставіла каля 40 яркіх, жыццярадасных, шчырых, напоўненых сапраўднай мастацкай смеласцю карцін, створаных юнымі мастакамі-студыйцамі. На адкрыцці экспазіцыі вучні студыі Рышарда Мая былі ўзнагароджаны ганаровымі дыпломамі.
Экспазіцыя "Прадчуванне колеру" размясцілася ў галерэі “Ракурс” (2-гі паверх).
Тэлефон для даведак: (8 017) 293 27 56.
Е-mail: pr@nlb.by
 |
 |
 |
 |
 |
 |
 |
 |
 |
 |
 |
 |
 |
 |
 |
