1 чэрвеня 2009 года ў галерэі “Панарама” адбылося адкрыццё фотавыстаўкі “Праменьчык сонца”, прымеркаванай да Міжнароднага дня абароны дзяцей.
Фотавыстаўка “Праменьчык сонца” стала вынікам фотасесіі ў дзіцячых дамах г. Мінска. На выстаўцы прадстаўлена каля 50 фотаработ вядомых беларускіх фотамастакоў Віталя Бруснінскага, Сяргея Кажамякіна і Віктара Суглоба, фотарэпарцёраў Паўла Паташнікава і Юрыя Кулікова.
Мэта праекта – звярнуць увагу грамадскасці на дзяцей, пазбаўленых бацькоўскай увагі і ўзятых на выхаванне ў дзіцячыя дамы. Праблема дзяцей-сірот у сучасным грамадстве паўстала як ніколі востра. Дзеці, якія засталіся без бацькоўскага цяпла і падтрымкі, маюць вялікую патрэбу ў клопаце і ўвазе тых, хто побач.
На мерапрыемства ў Нацыянальную бібліятэку Беларусі былі запрошаны выхаванцы дзіцячых дамоў, сацыяльных прытулкаў, шматдзетныя сем’і.
Вясёлыя дзіцячыя песенькі, незвычайныя карціны з пяску Алы Разумавай, група забаўных пантамімістаў, музычная імпрэза групы “Князь Мышкін”, салодкі пачастунак – усё гэта выклікала шчаслівыя ўсмешкі дзяцей, вочы іх свяціліся праменьчыкамі радасці і гарэзлівасці. Са словамі добрай парады да дзяцей звярнуліся намеснік дырэктара па навуковай рабоце і сувязях з грамадскасцю Нацыянальнай бібліятэкі Беларусі Людміла Кірухіна, куратары праекта Фёдар Ястраб і Юлія Едка, а таксама Максім Дубовік – прадстаўнік кампаніі «Life :)», якая падтрымала праект матэрыяльна.
Выстаўка будзе доўжыцца да 9 ліпеня.
 |
 |
 |
 |
 |
 |
 |
 |
