22 студзеня ў бібліятэцы адбылося ўрачыстае адкрыццё Рэспубліканскай выстаўкі тэкстыльнай скульптуры “Снежнае лета”.
Аўтарам і куратарам выстаўкі з’яўляецца заснавальнік першай некамерцыйнай беларускай галерэі “Брама”, мастацтвазнаўца Ларыса Фінкельштэйн.
Пачалося мерапрыемства з пластычнага, эмацыянальнага, чароўнага танца ў выкананні тэатра танца “ОтражениЯ”, удзельнікамі якога з’яўляюцца студэнты БДУІР. Сваёй кампазіцыяй яны стварылі настрой і задалі тэмп усяго мерапрыемства, пачуцці лёгкасці і бязважкасці не пакідалі гледачоў на працягу ўсёй урачыстасці.
Выступаючы з прывітальным словам, першы намеснік дырэктара Нацыянальнай бібліятэкі Беларусі Алена Далгаполава адзначыла поспех выстаўкі “Разумны метал”, якая прайшла ўвосень, арганізаванай Ларысай Фінкельштэйн, і пажадала натхнення ў творчасці куратару і майстрам.
Аўтар выстаўкі падзялілася з гасцямі гісторыяй стварэння праекта “Снежнае лета”, падзякавала ўсім, хто прыклаў намаганні і аказаў дапамогу ў яго рэалізацыі, і перадала слова мастаку, жывапісцу, заснавальніку і лідару аб’яднання “Талака” Рыгору Несцераву. Ён павіншаваў аўтара праекта і адзначыў, што выстаўка стварае асаблівы настрой сваімі пластычнасцю і вытанчанасцю. Гэтую думку ў наступным падтрымалі і іншыя выступоўцы.
“Я лічу, што спалучэнне скульптуры і габелена – самае свабоднае і дэмакратычнае, але ў той жа час і сакральнае, тут ёсць чаму здзіўляцца”, – сказаў мастак, член Саюза дызайнераў Беларусі Павел Семчанка. А пісьменніца Алена Папова адзначыла, што кожная работа экспазіцыі можа канкурыраваць з сусветнымі творамі мастацтва.
Сваімі ўражаннямі аб праекце падзяліліся намеснік дырэктара Нацыянальнага мастацкага музея Рэспублікі Беларусь Надзея Усава і паэтэса, член Саюза пісьменнікаў Беларусі Людміла Клачко.
Лёгкасць кампазіцый падкрэслілі ўдзельнікі дзіцячага калектыву “Чарадзейная флейта”, напаўняючы залу чароўнымі гукамі музыкі.
Наведвальнікі Нацыянальнай бібліятэкі Беларусі могуць пазнаёміцца з выстаўкай “Снежнае лета” ў галерэі “Ракурс”. Экспазіцыя будзе дэманстравацца да канца лютага.
Тэлефоны для даведак: (8 017) 293 27 56, 293 29 80.
Е-mail: pr@nlb.by
|
|
|
|
|
|
|
|
|
|
|
|
