17 cакавіка ў галерэі “Лабірынт” ладзілася адкрыццё выстаўкі “Спадчына ў фокусе аб'ектыва: сто пяцьдзесят гадоў фатаграфіі італьянскіх аб'ектаў Сусветнай культурнай і прыроднай спадчыны ЮНЕСКА”.
Арганізатары мерапрыемства, якое адбылося ў рамках святкавання 150-годдзя з дня аб’яднання Італіі, – Пасольства Італьянскай Рэспублікі ў Рэспубліцы Беларусь і Нацыянальная бібліятэка Беларусі.
У экспазіцыю выстаўкі ўвайшло больш за 200 гістарычных і сучасных фатаграфій са збораў Цэнтральнага інстытута каталагізацыі і дакументацыі Міністэрства культурнага здабытку і дзейнасці ў галіне культуры Італіі, якія прадстаўляюць 45 італьянскіх аб’ектаў, занесеных у спіс Сусветнай спадчыны ЮНЕСКА. Здымкі, створаныя на працягу ста пяцідзесяці гадоў, уяўляюць сабой гістарычныя кадры пяцідзесятых гадоў ХІХ стагоддзя, стэрэаскапічныя трохмерныя малюнкі канца ХІХ стагоддзя, гістарычныя паштоўкі, аэрафотаздымку і самыя сучасныя лічбавыя фатаграфіі.
Прадметам экспазіцыі, нароўні з выстаўкай фатаграфій аб’ектаў ЮНЕСКА, з’яўляецца мастацкае багацце Італіі, прадстаўленае зборам кніг па мастацтве выдавецкага дома “Франка Марыя Рычы”. Адзін з самых прэстыжных у свеце, ён вядомы дзякуючы выключнай якасці і майстэрству друкаваных выданняў, а таксама тэкстам, напісаным мастацтвазнаўцамі з сусветным імем.
У мерапрыемстве прынялі ўдзел Надзвычайны і Паўнамоцны Пасол Італьянскай Рэспублікі Арнальда Абеці, першы намеснік міністра культуры Рэспублікі Беларусь Уладзімір Карачэўскі, дырэктар Нацыянальнай бібліятэкі Беларусі Раман Матульскі, прадстаўнікі дыпламатычнага корпуса, італьянскай дыяспары, творчай інтэлігенцыі.
Выстаўка будзе доўжыцца да 10 красавіка ў галерэі “Атрыум” Нацыянальнай бібліятэкі Беларусі.