23 верасня адбылося адкрыццё фотавыстаўкі “Сустракаючыся з Шанхаем, заключаем у абдымкі свет”, прысвечанай гораду Шанхаю і сусветнай выстаўцы “Экспа-2010”.
Арганізатарамі мерапрыемства выступілі Пасольства Кітайскай Народнай Рэспублікі ў Рэспубліцы Беларусь і Нацыянальная бібліятэка Беларусі.
Экспазіцыя змяшчае больш за 60 фатаграфій, якія прадстаўляюць сучасны Шанхай і выстаўку “Экспа-2010”. Работы вядомых кітайскіх фатографаў дазваляюць наведвальнікам пазнаёміцца з гарадскім жыццём Кітая, убачыць у ім увесь сённяшні свет і зазірнуць у яго будучыню.
Выстаўка прымеркавана да Дзён Беларусі ў Кітаі (13–17 кастрычніка), Нацыянальнага дня беларускага павільёна на “Экспа-2010” у Шанхаі (11 кастрычніка) і Дня ўтварэння КНР (1 кастрычніка).
Адкрылі фотавыстаўку дырэктар Нацыянальнай бібліятэкі Беларусі Раман Матульскі і Надзвычайны і Паўнамоцны Пасол Кітайскай Народнай Рэспублікі ў Рэспубліцы Беларусь Лу Гуйчэн.
У мерапрыемстве ўзялі ўдзел намеснік начальніка ўпраўлення Азіі і Афрыкі Міністэрства замежных спраў Рэспублікі Беларусь Леанід Бацяноўскі, намеснік старшыні творчага саюза “Фотамастацтва” Іван Пятровіч, прадстаўнікі дыпламатычнага корпуса краін, акрэдытаваных у Рэспубліцы Беларусь.
Стварыць атмасферу Усходу ў сценах Нацыянальнай бібліятэкі Беларусі дапамаглі творчыя выступленні студэнтаў Беларускай акадэміі музыкі Ма Цзя, Шчэ Цзін, Ху Інан, Цзя Уан.
Выстаўка будзе доўжыцца ў галерэі “Ракурс” да 11 кастрычніка.