Для беларускага скульптара Яўгена Колчава фатаграфія ў апошнія гады стала любімым хобі. На выстаўцы аўтар прадставіў серыю фотапартрэтаў беларускіх мастакоў і мастацтвазнаўцаў, рэжысёраў, фатографаў, журналістаў.

Работы аўтара не пастановачныя фотасесіі, больш звыклыя для партрэтнага жанру, а фіксацыя вобраза ў жыццёвых абставінах. Сёння нам прадставілася магчымасць пераканацца ў тым, што аматарскія здымкі перараслі ў сапраўдны мастацкі праект, варты галерэйных паказаў. Кожны вобраз перадае свой асаблівы настрой, а таксама напоўнены глыбінёй, бо паказвае творчую сутнасць мастака, адлюстраванага ў партрэце.

Яўген Колчаў працуе ў галіне станковай скульптуры і анімалістыкі, прытрымліваецца рэалістычных традыцый у мастацтве. Асноўныя творы – “Мікеланджэла”, “Ікар”, “Салдаты”, “Каратэ”, “Накаўт”, “Спакуса”, “Яблык разладу”, “Двайняты”, “Пацалунак”, “Бег”, “Харты”, “Таксы”, а таксама серыя партрэтаў К. Каліноўскага, У. Маякоўскага, Р. Заслонава, А. Задорына, І. Бархаткова і інш.

У 1992–2000 гг. мастак працаваў у рэстаўрацыйных майстэрнях Польшчы, дзе прымаў актыўны ўдзел ва ўзнаўленні складаных архітэктурных і скульптурных элементаў гатычнага стылю барока; аб’екты знаходзяцца ў Польшчы і Германіі. Цяпер выкладае скульптуру ў Мінскім дзяржаўным мастацкім каледжы імя А.К. Глебава.

Творы Я. Колчава знаходзяцца ў калекцыі Музея сучаснага выяўленчага мастацтва (г. Мінск) і прыватных калекцыях у Беларусі і за мяжой. Член Беларускага саюза мастакоў.

У вернісажы прынялі ўдзел загадчык аддзела галерэйна-выставачнай дзейнасці Нацыянальнай бібліятэкі Беларусі Аляксандр Зіменка, скульптар, намеснік старшыні Саюза мастакоў Беларусі Аляксандр Дранец, мастак Аксана Аракчэева, фатограф Віталь Раковіч, мастацтвазнаўца Таццяна Бембель, куратар выстаўкі, дырэктар галерэі графікі “Кніжны салон” Ала Зміёва.

Тэлефоны для даведак: (8 017) 293 28 33, 266 37 37, 385 60 89.
Е-mail: pr@nlb.by

Святло і Колер

Інфармацыйныя рэсурсы

Паслугі