4 чэрвеня ў галерэі “Панарама” адбылося ўрачыстае адкрыццё сумеснай выстаўкі грузінскага і беларускага фотамастакоў Арчыла Кікодзэ і Уладзіміра Парфянка “Толькі асабістае”.
Арганізатарамі мерапрыемства выступілі Нацыянальная бібліятэка Беларусі і ААТ “Беларускі народны банк”.
Таленавітыя фотамастакі, добра вядомыя ў сябе на радзіме майстры сваёй справы Арчыл Кікодзэ і Уладзімір Парфянок прадставілі на выстаўцы 46 работ.
Цудоўныя грузінскія пейзажы, яркія народныя тыпажы таленавіта перададзены ў фатаграфіях Арчыла Кікодзэ. На яго здымках адлюстраваны вяршыні Эльбруса і Казбека, даліны і перавалы Каўказа, мост праз Куру і пакінутая вёска.
У чорна-белай серыі Уладзіміра Парфянка – работы з незавершанага цыкла “Невыразны ландшафт Беларусі” (2008–2009), які ўзнік у выніку шматразовых паездак з фотаэкспедыцыяй па паўночным і паўднёвым захадзе Беларусі.
Гасцей вернісажу і ўдзельнікаў выстаўкі віталі загадчык аддзела галерэйна-выставачнай дзейнасці Нацыянальнай бібліятэкі Беларусі Фёдар Ястраб і генеральны дырэктар ААТ “Беларускі народны банк” Канстанцін Цэрэтэлі.
Напярэдадні адкрыцця выстаўкі прайшла прэс-канферэнцыя фотамастакоў з прадстаўнікамі СМІ. Арчыл Кікодзэ і Уладзімір Парфянок расказалі пра гісторыю стварэння фотаработ, адказалі на пытанні журналістаў і падзяліліся сваімі творчымі планамі.
Выстаўка “Толькі асабістае” будзе доўжыцца да 14 чэрвеня.
Уваход на выстаўку платны. Плата за ўваход складае кошт наведвання агляднай пляцоўкі Нацыянальнай бібліятэкі Беларусі.
 |
 |
 |
