24 верасня ў галерэі “Панарама” адбылося адкрыццё выстаўкі жывапісу “Трыпутнік” Васіля Пяшкуна, Ганны Сілівончык і Марыі Пяшкун.
Наведвальнікі выстаўкі змаглі патрапіць у атмасферу бесклапотнага лета. Цёплае надвор’е, яркія колеры, водар лугоў, ласкавае дыханне ветру, ціхі шэпт лесу і шматгалосы шум пасёлкаў і вёсак, прыемную прахалоду азёр і яркі сонечны настрой прывезла з сабой з летніх пленэраў сям’я мастакоў: Васіль Пяшкун, Ганна Сілівончык і іх дачка Марыя Пяшкун.
Праца на прыродзе заўсёды вельмі карысная для жывапісца. Яна дае магчымасць знаёміцца з новымі месцамі і людзьмі, назіраць спантанныя і нечаканыя праяўленні сапраўднага жыцця, якое падказвае новыя сюжэты і тэмы, выступае як непасрэдны сааўтар мастака. Пры гэтым цікава, як адны і тыя ж матывы мастакі падаюць па-свойму, прапускаючы скрозь прызму свайго асабістага суб’ектыўнага разумення.
У Васіля Пяшкуна гэта жывыя і эмацыянальныя эцюды з натуры: пейзажы і нацюрморты. Ганна Сілівончык у сваіх работах, адштурхнуўшыся ад рэальнасці, пляце карункі асацыяцый, фантазій і мар. Работы Марыі адрозніваюцца дзіцячай непасрэднасцю і шчырасцю ўспрымання рэальнасці. У іх адчуваецца ўплыў абодвух бацькоў, але і маюцца свае асаблівасці.
На выстаўцы аматары жывапісу ўбачылі карціны, створаныя падчас летніх вандровак па Беларусі. Толькі самыя новыя палотны, самыя свежыя ўражанні і фарбы былі прадстаўлены ў экспазіцыі.
Гасцей выстаўкі прывіталі першы намеснік Саюза мастакоў Беларусі Аляксандр Дранец, загадчык аддзела галерэйна-выставачнай дзейнасці Нацыянальнай бібліятэкі Беларусі Аляксандр Зіменка, намеснік дырэктара Рэспубліканскай мастацкай галерэі “Палац мастацтваў” Наталля Барсукова.
Наведаць выстаўку можна да 21 кастрычніка 2015 г.
Уваход платны і складае кошт наведвання агляднай пляцоўкі.
Тэлефоны для даведак: (8 017) 293 28 33, 293 28 23.
 |
 |
 |
 |
 |
 |
 |
 |
 |
 |
 |
