9 сакавіка ў галерэі “Панарама” адбылося ўрачыстае адкрыццё выстаўкі “Творчасць Тараса Шаўчэнкі вачыма юных мастакоў”.
Дзень нараджэння вялікага ўкраінскага паэта Т.Р. Шаўчэнкі (1814–1861) наведвальнікі бібліятэкі адзначылі адкрыццём выстаўкі малюнкаў юных мастакоў, кожны з якіх у сваіх работах імкнуўся адлюстраваць асабістае бачанне творчасці Вялікага Кабзара, свет яго герояў, рэальную карціну народнага жыцця.
На выстаўцы прадстаўлены работы навучэнцаў мінскіх мастацкіх школ, студый, цэнтраў дадатковай адукацыі дзяцей і моладзі. Усе яны з’яўляюцца ўдзельнікамі I і II Мінскіх Шаўчэнкаўскіх конкурсаў малюнкаў, ініцыятарам якіх выступіла Мінскае грамадскае аб’яднанне ўкраінцаў “Заповіт”. Удзел у такіх конкурсах – цудоўная магчымасць для будучых мастакоў не толькі развіваць свае таленты і здольнасці, але і глыбей зразумець творчасць выдатнага майстра слова, паэта і мастака.
Адкрыў выстаўку дырэктар Нацыянальнай бібліятэкі Беларусі, старшыня таварыства дружбы “Беларусь – Україна” Раман Матульскі. Ён запрасіў усіх прысутных да знаёмства з экспанатамі выстаўкі, да ўзнаўлення сустрэч чытачоў з творчасцю Тараса Шаўчэнкі і падкрэсліў, што традыцыі будуць жыць і зберагацца, калі маладое пакаленне будзе памятаць і захоўваць агульную гісторыю.
Адкрыццё выстаўкі суправаджалася выступленнем хору хлопчыкаў Рэспубліканскай гімназіі-каледжа пры Беларускай дзяржаўнай акадэміі музыкі пад кіраўніцтвам Паўла Шэпелева. У выкананні навучэнцаў прагучалі песні “Мой родны кут” на словы Якуба Коласа, “Заповіт” на словы Т. Шаўчэнкі.
Усіх прысутных на вернісажы павіншаваў Часовы Павераны ў справах Украіны ў Рэспубліцы Беларусь Валерый Джыгун. Ён не толькі выказаў словы падзякі юным мастакам за тое, што звярнуліся да тэмы творчасці Шаўчэнкі, але з гонарам падкрэсліў, што Беларусь і Украіна – два братнія народы і сёння як ніколі важна і прыемна адчуваць падтрымку адзін аднаго.
Старшыня Мінскага грамадскага аб’яднання ўкраінцаў “Заповіт”, заслужаны работнік культуры Украіны Галіна Калюжная распавяла пра складанасці, з якімі сутыкнуліся юныя мастакі. Акрамя мастацкага майстэрства, дзеці прыклалі шмат намаганняў, каб пранікнуцца творчасцю паэта і выканаць свае малюнкі з усёй душой. Галіна Яфімаўна шчыра падзякавала арганізатарам і ўдзельнікам выстаўкі.
Экспазіцыя будзе доўжыцца да 3 красавіка 2016 года ў галерэі “Панарама” (22-гі паверх).
Чытайце таксама:
- Создана интерактивная биография Тараса Шевченко
- К 200-летию со дня рождения Тараса Шевченко
- Вышитый "Кобзарь" номинирован на Шевченковскую премию
- Библиотеке Конгресса США подарен "Кобзарь"
- Тарас Шевченко, Леся Украинка и Янка Купала
- Мастацкая выстаўка "Дарогамі Тараса Шаўчэнкі"
- Книжная выставка "В семье славянских муз"