27 сакавіка ў галерэі “Ракурс” (2-гі паверх) адкрылася мастацкая выстаўка Наталлі Камінскай “Асабістае”.
Любіць радзіму можна, вядома, і знаходзячыся далёка за акіянам, але прысвяціць ёй усё сваё жыццё, свой талент, сваю працу гатовы далёка не кожны. А вось мастачка са Смалявічаў Наталля Камінская – чалавек, горача ўлюбёны ў родны край і людзей, якія жывуць побач. Выстаўка “Асабістае” – гэта аповед мастачкі пра сям’ю, сяброў, родны горад і яго ваколіцы.
Скончыўшы мастацка-графічны факультэт Віцебскага дзяржаўнага ўніверсітэта імя П. М. Машэрава, Наталля вярнулася ў родныя пенаты з гарачым жаданнем развіваць культуру і мастацтва ў маленькім горадзе Смалявічы. У нейкі момант яна стала чалавекам – эпіцэнтрам досыць значнай часткі мастацкага жыцця смалявіцкага краю.
З 1999 года па сённяшні дзень мастачка выкладае ў Смалявіцкай дзіцячай школе мастацтваў. Многія з яе вучняў – лаўрэаты і пераможцы рэспубліканскіх і міжнародных конкурсаў. Акрамя таго, ужо сёмы год запар на смалявіцкай зямлі Наталля арганізуе арт-пленэр педагогаў-мастакоў “Лета ў правінцыі”, а таксама сама актыўна прымае ўдзел у шматлікіх выстаўках у Беларусі і за мяжой.
У вернісажы ўзялі ўдзел першы намеснік дырэктара Нацыянальнай бібліятэкі Беларусі Алена Далгаполава, заснавальнік і аўтар канцэпцыі галерэі “БРАМА” Ларыса Фінкельштэйн, прафесар кафедры народнага дэкаратыўна-прыкладнога мастацтва БДУКіМ Уладзімір Рынкевіч, прафесар кафедры гісторыі і тэорыі мастацтваў БДАІ Яўген Шунейка, мастак Леанід Гоманаў, мама мастачкі Валянціна Філатава і класны кіраўнік Пётр Крэнін.
Выстаўка арганізавана Нацыянальнай бібліятэкай Беларусі і аўтарскай некамерцыйнай канцэптуальнай галерэяй “БРАМА”, з якой бібліятэка неаднаразова супрацоўнічала на пляцоўках сваіх галерэй.
Пазнаёміцца з жывапісам і прыадчыніць дзверы ў асабістую прастору мастачкі Наталлі Камінскай запрашаем да 28 красавіка 2018 года.
Дата заканчэння работы выстаўкі можа быць зменена.
Тэлефоны для даведак: (8 017) 266 37 37, 293 28 23.
Е-mail: pr@nlb.by
