22 красавіка ў галерэі “Панарама” адбылося ўрачыстае адкрыццё мастацкай выстаўкі “Дарогамі Тараса Шаўчэнкі”.
Мерапрыемства было арганізавана Нацыянальнай бібліятэкай сумесна з Пасольствам Украіны ў Рэспубліцы Беларусь і прымеркавана да 195-годдзя выдатнага ўкраінскага паэта і мастака Тараса Рыгоравіча Шаўчэнкі.
Мастацкая выстаўка – вынік работы пастаянна дзеючай творчай экспедыцыі мастакоў львоўскага Палаца мастацтваў. Па тэрыторыі Украіны мастакі пераадолелі 9 тыс. км, пабылі ў Літве, Казахстане, Расіі, у прыватнасці, у Маскве і Санкт-Пецярбургу, а ў чэрвені 2008 года наведалі Беларусь. У час падарожжа было напісана больш за 100 палотнаў. Работы некаторых удзельнікаў экспедыцыі экспануюцца на выстаўцы ў Нацыянальнай бібліятэцы Беларусі. Да ўвагі наведвальнікаў прадстаўлены жывапіс, фотаработы, а таксама філатэлічныя стэнды, прысвечаныя Т. Шаўчэнку.
На цырымоніі адкрыцця выстаўкі прысутнічалі Надзвычайны і Паўнамоцны Пасол Украіны ў Рэспубліцы Беларусь І.Д. Ліхавы, Надзвычайны і Паўнамоцны Пасол Казахстана ў Рэспубліцы Беларусь А.В. Смірноў, прадстаўнікі Пасольства Літвы ў Рэспубліцы Беларусь. З вітальным словам да гасцей звярнулася намеснік дырэктара Нацыянальнай бібліятэкі Беларусі па інфармацыйна-бібліятэчным абслугоўванні А.Е. Далгаполава.
З разважаннямі пра творчасць Т. Шаўчэнкі выступілі Надзвычайны і Паўнамоцны Пасол Украіны І.Д. Ліхавы, доктар філалагічных навук, прафесар А.І. Мальдзіс, загадчык аддзела галерэйна-выставачнай дзейнасці Нацыянальнай бібліятэкі Беларусі Ф.А. Ястраб.
Музычны нумар гасцям падарыў дуэт бандурыстаў.
 |
 |
 |
 |
 |
 |
