З 24 лютага да 15 сакавіка ў галерэі “Панарама” праходзіць выстаўка вядомага ўкраінскага майстра фатаграфіі Ігара Гайдая.
Мерапрыемства арганізавана Пасольствам Украіны ў Рэспубліцы Беларусь сумесна з Нацыянальнай бібліятэкай Беларусі.
Фотамастак прадставіў тры аўтарскія праекты: “Космас украінскага хлеба”, “Украінцы” і “9 месяцаў і 3 дні”.
У аснове першага праекта – просты і ў той жа час незвычайны погляд на хлеб. Другі праект – калекцыя фотаздымкаў украінцаў, знакамітых і невядомых, звычайных і неардынарных, старых і маладых, аб’яднаных адной рысай – магчымасцю быць самім сабой перад аб’ектывам. Серыя здымкаў трэцяга праекта – візуальнае сведчанне любові, партрэт сапраўднага шчасця, якое абвяшчае пра сябе з кожным новым крыкам немаўляці.
Выстаўкі гэтых работ ужо дэманстраваліся ва Украіне і Еўропе і атрымалі шырокі рэзананс у прэсе.
Адкрылі вернісаж Надзвычайны і Паўнамоцны Пасол Украіны ў Рэспубліцы Беларусь Ігар Ліхaвы, дырэктар Нацыянальнай бібліятэкі Беларусі Раман Матульскі і аўтар фотапраектаў Ігар Гайдай.
У мерапрыемстве ўзялі ўдзел рэктар Нацыянальнага педагагічнага ўніверсітэта імя М. Драгаманава Віктар Андрушчанка, мастацтвазнавец Ірына Шчарбанюк, загадчык аддзела галерэйна-выставачнай дзейнасці Нацыянальнай бібліятэкі Беларусі Фёдар Ястраб.
Акрамя шырокафарматных фатаграфій, экспазіцыя змяшчае і фотакнігі Ігара Гайдая “Украинцы” і “9 месяцев + 3дня”, у якія ўвайшлі некаторыя работы, не прадстаўленыя ў галерэі “Панарама”. Пасля заканчэння выстаўкі кнігі зоймуць ганаровае месца ў фондах Нацыянальнай бібліятэкі Беларусі.