Беларускі першадрукар Францыск Скарына пачаў выдавецкую дзейнасць у 1517 годзе ў Празе. Першай кнігай стаў Псалтыр, у якім была пазначана дата завяршэння. Дзякуючы гэтаму мы ведаем не толькі год, а нават дзень нараджэння беларускай друкаванай кнігі – 6 жніўня 1517 года.
Францыск Скарына прыняў рызыкоўнае рашэнне заняцца практычна невядомай у Вялікім Княстве Літоўскім выдавецкай справай. Ён быў шматбакова адораным чалавекам, здольным на змены, новыя ідэі, творчасць і рэалізацыю сваіх задум. За кароткі час ён завяршыў сапраўды тытанічную працу па падрыхтоўцы кніг Старога Запавету да друку. Скарына перакладаў тэксты, пісаў аўтарскія каментарыі, ствараў шрыфты і гравюры.
У Празе ён арэндаваў адну з друкарняў, дзе і былі выдадзены кнігі пад агульнай назвай “Бивлия руска”.
У кожным выданні Скарына змяшчаў прадмовы і пасляслоўі. У пасляслоўі да першай кнігі – “Псалтыр” (Прага, 1517) – ён пазначыў:
“Скончалася Псалтыр сия з Божиею помощию повелением и працею избранного мужа в лекарских науках доктора Франциска Скоринина сына с Полоцька у старом месте Празском лета по божьем нарожению тысещного пятсотого и семогонадесеть, месеца августа дъня шестаго”.
У музеі кнігі Нацыянальнай бібліятэкі Беларусі дэманструюцца кнігі, выдадзеныя асветнікам. У бібліятэках і музеях краіны захоўваецца факсімільнае выданне кніг першадрукара – копіі, якія дакладна перадаюць усе асаблівасці арыгіналаў. Факсімільнае выданне “Кніжная спадчына Францыска Скарыны” дае магчымасць кожнаму пагартаць кнігі і падрабязна пазнаёміцца з іх тэкстам і мастацкім афармленнем.
Прайдзіце тэст “Францыск Скарына”, адкажыце на пытанні і дазнайцеся яшчэ больш пра беларускага першадрукара.
Матэрыял пададзены навукова-даследчым аддзелам кнігазнаўства.
