Адным з юбілейных мерапрыемстваў стала навукова-практычная канферэнцыя, якая адбылася 26 лістапада ў Магілёўскім абласным мастацкім музеі імя П.В. Масленікава.
Мэта канферэнцыі – кансалідацыя дзейнасці ўстаноў культуры і адукацыі г. Магілёва па развіцці адзінай інтэлектуальнай і інфармацыйнай прасторы і садзейнічанні фарміраванню рознабакова развітай, маральна сталай, творчай асобы.
Арганізатары – установа культуры “Цэнтралізаваная сістэма дзяржаўных публічных бібліятэк г. Магілёва”, установа культуры “Магілёўскі абласны мастацкі музей імя П.В. Масленікава”, установа адукацыі “Магілёўскі абласны інстытут развіцця адукацыі”.
У канферэнцыі прынялі ўдзел прадстаўнікі навукі, культуры, адукацыі, сродкаў масавай інфармацыі.
На адкрыцці канферэнцыі з прывітальным словам выступілі Караткевіч Іна Фёдараўна, начальнік упраўлення ідэалагічнай работы, культуры і па справах моладзі Магілёўскага гарадскога выканаўчага камітэта, Краўчанка Галіна Іванаўна, дырэктар Цэнтралізаванай сістэмы дзяржаўных публічных бібліятэк (ЦСДПБ) г. Магілёва.
У рабоце канферэнцыі таксама прыняла ўдзел загадчыца сектара навукова-даследчага аддзела бібліятэказнаўства Нацыянальнай бібліятэкі Беларусі Рынкевіч Вольга Аляксандраўна з дакладам “Роля публічнай бібліятэкі ў інфармацыйным і культурным кантэксце сучаснага грамадства”. Яна перадала калектыву Цэнтральнай гарадской бібліятэкі імя К. Маркса віншаванні з юбілеем, Ганаровую грамату Міністэрства культуры Рэспублікі Беларусь і прывітальны адрас ад калектыву Нацыянальнай бібліятэкі Беларусі. Дырэктар ЦСДПБ г. Магілёва Краўчанка Галіна Іванаўна атрымала Ганаровую грамату ад Беларускай бібліятэчнай асацыяцыі.
У мерапрыемстве з дакладамі прынялі ўдзел вучоныя-даследчыкі, выкладчыкі Магілёўскага дзяржаўнага ўніверсітэта імя А. Куляшова, Магілёўскага дзяржаўнага абласнога інстытута развіцця адукацыі, а таксама спецыялісты Магілёўскай абласной бібліятэкі імя У.І. Леніна і ЦСДПБ г. Магілёва, Магілёўскага абласнога мастацкага музея імя П.В. Масленікава. Пад час канферэнцый абмяркоўваліся пытанні захавання духоўнай спадчыны, сучасныя праблемы забеспячэння доступу грамадзян рэспублікі да інфармацыі і ведаў, рознабаковыя аспекты кансалідацыі і супрацоўніцтва ўстаноў культуры і адукацыі па далучэнні жыхароў рэгіёна да культурных традыцый і нацыянальных каштоўнасцей.
Удзельнікі канферэнцыі сталі першымі гледачамі відэафільма “На шляху к дасканаласці”, які адлюстроўвае працэс станаўлення і развіцця Цэнтральнай гарадской бібліятэкі імя К. Маркса. Пазнаць глыбей гісторыю і пазнаёміцца з работай бібліятэкі ў сучасных рэаліях спрыяла выстаўка-прэзентацыя “Цэнтральная гарадская бібліятэка імя К. Маркса: узрост, дастойны гісторыі”.
Па заканчэнні канферэнцыі для ўдзельнікаў была арганізавана экскурсія па выставачных залах мастацкага музея імя П.В. Масленікава.
 |
 |
 |
 |
 |
 |
