12 чэрвеня на базе Нацыянальнай бібліятэкі Беларусі і Брэсцкай, Віцебскай, Гомельскай, Гродзенскай і Магілёўскай абласных універсальных бібліятэк у аддаленым рэжыме прайшло пасяджэнне круглага стала па пытанні аб'яднання публічных і школьных бібліятэк, размешчаных у сельскай мясцовасці.
Мерапрыемства адбылося пры тэхнічнай падтрымцы СТАА “Мабільныя тэлесістэмы”.
У пасяджэнні прынялі ўдзел прадстаўнікі Міністэрства адукацыі Рэспублікі Беларусь, галоўных упраўленняў ідэалагічнай работы, культуры і па справах моладзі, упраўленняў адукацыі аблвыканкамаў, кіраўнікі і спецыялісты Мінскага абласнога вучэбна-метадычнага цэнтра, Нацыянальнага інстытута адукацыі, абласных і цэнтральных бібліятэк.
У 2013–2014 гадах працэс аб’яднання публічных і школьных бібліятэк, размешчаных у сельскай мясцовасці, актыўна развіваўся. На 01.06.2014 года ў рэспубліцы арганізавана 216 аб’яднаных бібліятэк: у Брэсцкай вобласці – 40, Віцебскай – 15, Гомельскай – 54, Гродзенскай – 44, Мінскай – 30 і ў Магілёўскай вобласці – 33. У рамках эксперыменту, пачатага ў 2012 годзе па ініцыятыве Міністэрства культуры ў адпаведнасці з даручэннем Савета Міністраў Рэспублікі Беларусь, было аб’яднана 130 бібліятэк.
На сённяшні дзень 4 аб’яднаныя бібліятэкі ўжо зачынены: 1 – у Гомельскай і 3 – у Гродзенскай вобласці. 1 бібліятэка ў Гомельскай вобласці ператворана ў клуб-бібліятэку. Такім чынам, на 01.06.2014 года ў Беларусі функцыянуе 211 аб’яднаных бібліятэк.
Пад час пасяджэнняў былі абмеркаваны пытанні аб’яднання публічных і школьных бібліятэк у кожнай з абласцей і праблемы, якія ўзнікаюць у ходзе аптымізацыі бібліятэчнай сеткі.
 |
 |
 |
