Віртуальная чытальная зала Нацыянальнай бібліятэкі паведамляе, што на тэрыторыі Беларусі на працягу 2019 года для ўсіх арганізацый адкрыты бясплатны доступ да электроннага інфармацыйнага рэсурсу Cochrane Library.
Гэта магчымасць рэалізавана ў рамках праграмы доступу да даследаванняў у галіне аховы здароўя HINARI, ініцыяванай Сусветнай арганізацыяй аховы здароўя. Рэсурс прадастаўлены міжнародным выдавецтвам Wiley.
Cochrane Library – калекцыя баз даных па доказнай медыцыне, якая ўключае Какрэйнаўскую базу даных сістэматычных аглядаў (CDSR), Какрэйнаўскі цэнтральны рэестр кантралюемых выпрабаванняў (CENTRAL), Какрэйнаўскія клінічныя адказы і іншыя.
Ядром калекцыі з'яўляецца Какрэйнаўская база даных сістэматычных аглядаў (CDSR) – паўнатэкставая база даных сістэматычных аглядаў, якія змяшчаюць даказаныя навуковыя факты. Рэсурс рэгулярна абнаўляецца па меры атрымання новых вынікаў выпрабаванняў.
Cochrane Library прызначаны для практыкуючых урачоў, даследчыкаў, кіраўнікоў медыцынскіх устаноў і ўсіх, хто зацікаўлены ў выкарыстанні якаснай інфармацыі для прыняцця рашэнняў у галіне аховы здароўя.
Доступ адкрыты да 31 снежня 2019 г.
Матэрыял прадастаўлены аддзелам карпаратыўнага ўзаемадзеяння.