Такая выснова была зроблена на XVI Міжнародным кангрэсе славістаў, які гэтымі днямі праходзіць у сталіцы Сербіі Бялградзе.
22 жніўня ў межах XVI Міжнароднага з’езда славістаў прайшло асобнае вялікае мерапрыемства, прысвечанае выпуску шматтомнага выдання “Кніжная спадчына Францыска Скарыны”. Вядомыя славісты з шматлікіх краін свету прынялі ўдзел у прэзентацыі і абмеркаванні беларускага выдавецкага праекта.
Сусветнай навуковай супольнасці выданне прадставілі намеснік дырэктара Нацыянальнай бібліятэкі Беларусі, старшыня Міжнароднай асацыяцыі беларусістаў Аляксандр Суша і акадэмік Нацыянальнай акадэміі навук Беларусі, старшыня Беларускага камітэта славістаў Аляксандр Лукашанец.
Супольнымі намаганнямі беларускія даследчыкі прадэманстравалі багацце кніжнай культуры Беларусі і здольнасць беларусаў шанаваць дасягненні сваіх папярэднікаў. Праведзеная Нацыянальнай бібліятэкай Беларусі пры падтрымцы Банка БелВЭБ праца па вывучэнні і папулярызацыі кніжнай спадчыны беларускага першадрукара была ўспрынята паважанай аўдыторыяй як адзін з найлепшых прыкладаў да пераймання. Усе пагадзіліся, што дадзены выдавецкі праект дазволіў актуалізаваць значэнне кніжнай спадчыны далёкага мінулага ў сучасным культурным жыцці славянскага свету і паспрыяў умацаванню станоўчага іміджу Беларусі ў свеце.
Пасля завяршэння XVI Міжнароднага кангрэса славістаў кнігі трапяць у зборы Бібліятэкі Бялградскага ўніверсітэта. Годам раней камплект факсімільнага выдання ўжо быў перададзены ў Нацыянальную бібліятэку Сербіі.
Даведка: Міжнародны навуковы і выдавецкі праект па аднаўленні кніжнай спадчыны беларускага першадрукара, рэалізаваны Нацыянальнай бібліятэкай Беларусі і Банкам БелВЭБ, завяршыўся напярэдадні святкавання 500-годдзя беларускага кнігадрукавання і стаў кульмінацыяй юбілейных мерапрыемстваў у Беларусі і за мяжой.
