Культурна-асветніцкая акцыя, прысвечаная творчасці беларускага кампазітара Уладзіміра Кандрусевіча, стала працягам святкавання Сусветнага дня кнігі і аўтарскага права ў Нацыянальнай бібліятэцы Беларусі.
Падчас мерапрыемства адбылася перадача праў на выкарыстанне рукапісаў нот аўтара ў інфармацыйных рэсурсах бібліятэкі.
Уладзімір Кандрусевіч напісаў музыку больш чым да 200 спектакляў і 32 фільмаў, удастоены Дзяржаўнай прэміі Рэспублікі Беларусь у галіне літаратуры, мастацтва і архітэктуры за стварэнне музыкі да балета “Мефіста”, мюзіклаў “Шклянка вады”, “Джулія”, “Соф’я Гальшанская”, “Байкер”. Мюзікл “Соф’я Гальшанская”, пастаўлены ў Беларускім дзяржаўным акадэмічным музычным тэатры, атрымаў Нацыянальную тэатральную прэмію.
У рамках культурна-асветніцкай акцыі адбылося выступленне Наталлі Гайды, народнай артысткі Беларусі, актрысы аперэты, салісткі Беларускага дзяржаўнага акадэмічнага музычнага тэатра. Значную старонку ў творчай біяграфіі артысткі займаюць вобразы ў тэатральных пастаноўках, музыку да якіх напісаў Уладзімір Кандрусевіч.
Пра супрацоўніцтва з кампазітарам распавяла Алена Турава, рэжысёр анімацыйнага і ігравога кіно Нацыянальнай кінастудыі “Беларусьфільм”, сцэнарыст, паэтка, дацэнт кафедры рэжысуры кіно і тэлебачання Беларускай дзяржаўнай акадэміі мастацтваў. Поўнаметражныя ігравыя фільмы “Кіндэрвілейскі прывід” і “Рыжык у Залюстроўі”, аўтар музыкі да якіх – Уладзімір Кандрусевіч, атрымалі высокую ацэнку на розных кінафестывалях.
Цёплымі ўспамінамі пра сяброўства з Уладзімірам Пятровічам падзяліўся Аляксандр Сёмкін.
Адным з этапаў творчага шляху Уладзіміра Кандрусевіча стала супрацоўніцтва з прадзюсерскім цэнтрам “Спамаш”, яркія прадстаўнікі якога прынялі ўдзел у мерапрыемстве. Вядомая беларуская спявачка Дарыя выканала песню “Талісман” на музыку Уладзіміра Кандрусевіча. Удзельнікі акцыі з задавальненнем праслухалі музычную кампазіцыю “Белая ластаўка” ў выкананні заслужанай артысткі Рэспублікі Беларусь Алёны Ланской.
Наведвальнікі акцыі атрымалі ўнікальную магчымасць пачуць фрагменты музычных твораў у выкананні аўтара, пагутарыць з кампазітарам.
Прыемным сюрпрызам для гасцей мерапрыемства сталі падораныя Уладзімірам Кандрусевічам дыскі з яго творамі.