24 кастрычніка адбыліся заняткі на выставе “Тайны канцылярыі”. Эксклюзіўную экскурсію для дзетак правёў кандыдат культуралогіі Алесь Суша.
Музейныя заняткі былі арганізаваны ў межах праекта “Клуб кніжных прафесараў”. Удзельнікі ўбачылі арыгінальныя артэфакты і даведаліся, чым пісалі нашы продкі ў XV–XX стст.
Сёння канцылярскія прылады ўспрымаюцца як нешта само сабой зразумелае. Вучні карыстаюцца імі ў школах, студэнты – ва ўніверсітэтах, а дарослыя – у сваіх офісах. Заняткі дазволілі ўбачыць у звыклых прадметах незвычайнае, здзейсніць падарожжа ў мінулае і даведацца цікавыя гісторыі розных прылад. У экспазіцыі музея кнігі – першыя алоўкі і асадкі, пер’ячысткі, пясочніцы, чарніліцы і нават пісьмовыя прылады знакамітых людзей.
Пасля змястоўнай экскурсіі эксперта дзетак чакала практычная частка заняткаў. Сучасная пёравая асадка звычайна складаецца з корпуса з запраўным механізмам. А юныя прафесары мелі ўнікальную магчымасць пісаць асадкамі ХХ ст., якімі пісалі іх бабулі і дзядулі, – пёравымі асадкамі, якія не запраўляюцца і падчас пісання перыядычна акунаюцца ў чарніліцу для набору порцыі чарніла.
Матэрыял пададзены навукова-даследчым аддзелам кнігазнаўства.