29–30 верасня ў сталіцы Азербайджана адбыўся V Бакінскі міжнародны гуманітарны форум.
На цырымоніі яго афіцыйнага адкрыцця выступіў з прамовай прэзідэнт Азербайджана Ільхам Аліеў. Сёлета форум сабраў звыш 900 дэлегатаў з 80 краін, каб абмеркаваць перспектывы і выклікі XXI стагоддзя з улікам рэалій свету, які глабалізуецца. У складзе дэлегацыі з Беларусі ў рабоце форуму прыняў удзел дырэктар Нацыянальнай бібліятэкі Беларусі Раман Матульскі.
Бакінскі міжнародны гуманітарны форум – гэта штогадовае мерапрыемства выдатных прадстаўнікоў палітычнай, навуковай і культурнай эліты сусветнай супольнасці, уключаючы вядомых дзяржаўных дзеячаў, лаўрэатаў Нобелеўскіх прэмій па розных галінах навукі і кіраўнікоў уплывовых міжнародных арганізацый. У рамках форуму 2016 года былі арганізаваны круглыя сталы па шасці кірунках:
- Розныя мадэлі мультыкультуралізму: ад тэорыі да гуманістычнай практыкі.
- Важнасць захавання чалавечага капіталу ва ўмовах масавага перамяшчэння людзей як аснова для ўстойлівага развіцця.
- Трансфармацыя журналістыкі ў інфармацыйную эпоху і яе роля ў забеспячэнні міжцывілізацыйнага дыялогу.
- Устойлівае развіццё і экалагічная цывілізацыя.
- Малекулярная біялогія, біяфізіка, біятэхналогія і пытанні падрыхтоўкі кадраў у сучаснай медыцыне: інавацыйныя і этычныя праблемы.
- Канвергенцыя тэхналогій і прагнозы будучыні: асноўныя выклікі XXI стагоддзя.
