10 кастрычніка ў бібліятэцы адбылася творчая імпрэза “Барадулін у нашых сэрцах”, прымеркаванае да 85-годдзя народнага паэта Беларусі Рыгора Барадуліна – творцы, чыё імя стаіць у шэрагу найвыбітнейшых беларускіх паэтаў усіх часоў.
Мерапрыемства пачалося з урачыстага чытання вершаў у выкананні актрысы тэатра і кіно Юліі Шпілеўскай.
Ганаровай госцяй стала ўдава паэта – Валянціна Міхайлаўна Барадуліна. Паэт і фотамастак Георгій Ліхтаровіч падзяліўся сваімі ўспамінамі і прачытаў верш. Паэт і кампазітар Алесь Камоцкі выканаў песні на вершы Рыгора Барадуліна.
Асноўнымі ўдзельнікамі сустрэчы сталі юныя чытачы, якія бралі ўдзел у конкурсе, прысвечаным паэту. Школьнікі з розных куточкаў краіны стваралі плакаты з улюбёнымі ўрыўкамі з твораў Барадуліна і пісалі эсэ. Яны разам з бацькамі і настаўнікамі прыехалі на мерапрыемства з Мінска, Брэста, Магілёва, Рэчыцы, Паставаў і іншых гарадоў і вёсак Беларусі.
Юныя ўдзельнікі чыталі вершы, а таксама ўласныя эсэ, у якіх раскрылі разуменне слова паэта, свае асэнсаванні і перажыванні. Любімыя вершы Рыгора Барадуліна прадэкламавалі Алёна Сямашка, Марцін Лабашоў і Арына Ленкавец (г. Мінск). Конкурсныя эсэ прачыталі Мiкола Пякуцька, Марыя Каралёва і Марыя Царова (г. Мінск), Мікіта Сёмін (г. Брэст), Арына Нахват і Тэрэза Баранава (вёска Застарынне Баранавіцкага раёна), Ілья Талстыка (в. Вялікая Сваротва Баранавіцкага раёна).
Намеснік генеральнага дырэктара па навуковай рабоце і выдавецкай дзейнасці Нацыянальнай бібліятэкі Беларусі Аляксандр Суша выказаў словы захаплення і падзякі ўдзельнікам, азначыўшы важнасць конкурсу, які спрыяў выхаванню маладога пакалення на лепшых узорах нацыянальнай літаратуры і стварыў магчымасці для самарэалізацыі і развіцця творчага патэнцыялу асобы.
Вяла імпрэзу Таццяна Сапега, куратар конкурсу, загадчык сектара навукова-праектнай работы Нацыянальнай бібліятэкі Беларусі.
Сустрэча завяршылася ўрачыстым узнагароджаннем удзельнікаў конкурсу дыпломамі і экскурсіяй па бібліятэцы.
Матэрыял падрыхтаваны навукова-даследчым аддзелам кнігазнаўства ў межах праектаў “У госці да кніг” і “Стварай культуру: бібліятэчныя інавацыйныя паслугі”.
